Isixazululo sizoqhamuka kwi-ANC: abahlaziyi
ABAHLAZIYI bezepolitiki bathi kuzomele i-ANC izehlise futhi ithole isixazululo sangaphakathi uma isafuna ukubumbana.
Bebephawula ngomhlangano, isigungu esiphezulu sale nhlangano esizokuba nawo ngoLwesihlanu. Kuzobe kuhlanganelwe ukuzama ukuthola isixazululo ngesinqumo senkantolo sokuchithwa komphumela wengqungquthela yangoNovemba 2015 eyayiseMgungundlovu.
Engqungqutheleni kwakhethwa uMnuz Sihle Zikalala njengosihlalo omusha we-ANC KwaZulu- Natal.
Ngakolunye uhlangothi abahambisana noMnuz Senzo Mchunu bebekhala ngokuthi kwaphulwa eminye imigomo yokhetho, baphetha ngokufaka udaba enkantolo.
INkantolo eNkulu eMgungundlovu igcine ngokuvuna uhlangothi lwabahambisana noMchunu yathi ingqungquthela ayihambanga ngokuyikho.
USolwazi Bheki Mngomezulu, ongumhlaziyi wezepolitiki, uthe njengamanje isimo sibukeka siphuma esandleni kwi-ANC.
“Ngokwami akudingeki ukuthi kuze kutholakale imvume kwi-NEC. Izinhlangothi ezingavumelani okumele zehlele ngezansi kuqala,” usho njalo.
Uthe uma kungukuthi isigungu esiphezulu siyangenelela kumele siqaphele ukuthi asiqhubezeli ukungaboni ngaso linye enhlanganweni.
“Isixazululo sezepolitiki sokwehlela ngezansi kwazo zonke izinhlangothi ezithintekayo yisona esizokuba yisisombululo kulolu daba,” kusho uMngomezulu.
Uthe ukuqala phansi kabusha ukhetho, kube khona abakhishwayo emahhovisi nokudlulisela phambili icala ngeke kube yisixazululo.
Uthe sekucacile ukuthi ngaphandle kokuhlala phansi lusombululwe ngokwezepolitiki lolu daba ngeke siphinde sitholakale isixazululo salo.
“Kuzomele kube khona isakhiwo sesikhashana esimele izinhlangothi zombili, okuyisona okumele sibe khona ngesikhahi kusafunwa isixazululo sangempela.”
Uthe njengamanje izinto zimapeketwane njengoba kulindeleke ukuthi kuyiwe okhethweni lokukhetha ubuholi ngoDisemba.
“IKwaZulu-Natal yisona sifundazwe esinezithunywa eziningi uma kuyiwa okhethweni. Ukungabi khona kwaso kungadala inkinga. Yingakho kubalulekile ukuthi kutholakale isixazululo ngokuthi izinhlangothi zehlele ngezansi,” usho njalo.
Uthe ukubanjwa kwengqungquthela, lesi sifundazwe sinhlakanhlaka kungasho ifu elimnyama elilengela le nhlangano ngoba nomphumela wokhetho ngeke wamukeleke kwabahluliwe.
UMnuz Protas Madlala, ongumhlaziyi ozimele wezepolitiki, uthe osekumele kwenziwe yisigungu esiphezulu, wukuba yinhloko njengobaba osuke ehlanganisa umndeni wakhe uma kukhona okungahambi kahle ekhaya.
“Kufanele kusetshenziswe amasu asetshenziswa uma kuhlanganiswa izinkampani ezimbili,” kusho uMadlala.
Uthe osekudingeka futhi ngubuchule obusetshenziswa uma sekukhona isimo sokudilizwa kwabantu emsebenzini, lapho kuvunyelwana khona ngokuthi kumele kufunwe izindlela zokungadilizwa kwabantu.
“Kuzophoqa ukuthi kwakhiwe ithimba elizokwenza konke lokhu. Nakuba kuzobe kuphoqwa ubumbano olungekho kodwa kungcono kunokuthi izinto ziyekelelwe kanjalo,” kusho uMadlala.
Uthe lokhu ukusho ngoba uhlangothi olweseka uMchunu luthi lwabika esigungwini esiphezulu sale nhlangano phambilini, sinxusa ukuthi singenelele ngaphambi kokuthi udaba luyiswe enkantolo.