I-KPMG izalelwe yinja endlini ngombiko wayo

INKAMPANI yabacwaningi mabhuku, iKPMG, ibizwe yikomidi lasePhalamende elibhekelele izimali zomphakathi, iScopa, ukuthi ivele phambi kwalo mayelana nombiko wayo owaziwa ngeSars Rogue Unit.

I-KPMG ibe nengcindezi evela kwiScopa ne-ANC ePhalamende selokhu yathatha isinqumo sokuhoxisa umbiko weSars Rogue Unit nokuxosha izikhulu zayo eziyisikhombisa.

USihlalo weScopa, uMnuz Themba Godi, uthe akukapheli ngodaba lakwaKPMG ngoba basafuna ezinye izimpendulo. Uthe uma le nkampani isafuna ukwenza ibhizinisi nohulumeni nezinkampani zikahulumeni kumele ikusho konke ngamahlazo ayo.

IKPMG isolwa ngokuthi yashintsha izindleko zomshado wakwaGupta owawuseSun City ngo-2013 yazenza izindleko zebhizinisi.

Ibhodi elizimele labacwaningi mabhuku seliqalile ukuphenya iKPMG ngodaba lwe-akhawunti yakwaLinkway Trading. Uphenyo luqale ngoJuni ngesikhathi kuqala izinkulumo ngalolu daba kanti ngempelasonto liveze ukuthi uphenyo lwayo alukaphothulwa.

Uphenyo lumayelana nemali eyathathwa epulazini eVrede, eFree State, ukuze ikhokhele umshado wakwaGupta.

Izinhlangano eziphikisayo zifuna izimpendulo ngokuthathwa kuka-R30 million eVrede. Sezivulele umndeni wakwaGupta amacala.

UGodi uthe ufuna abakwaKPMG beze ephalamende bazoziphendulela.

“I-Scopa sifuna ukuba bazochaza ngendlela abenze ngayo.”