OweSolezwe uphinde wahlabana ngendondo
IKUPHINDILE lokho intatheli yeSolezwe yezemidlalo, uMinenhle Mkhize, ibaqwaqwada emakhanda ngesikhathi kunomcimbi iKZN Sports Awards e-International Convention Centre (ICC), eThekwini, ngempelasonto.
UMkhize (25) oseneminyaka eyisikhombisa ebuntathelini, ukhale wemuka nomklomelo iSports Journalist of the Year abesewuthola okwesibili ngoba nanyakenye kugiye yena.
UMkhize, odabuka KwaMakhutha, uzenzele igama ngokubhala izindaba ezinohlonze ikakhulukazi zokudayiswa kwabadlali. Nguyena owayehamba phambili ngokubika ngokudayiswa kukaKeagan Dolly eqenjini laphesheya kwezilwandle iMontepellier esuka kwiMamelodi Sundowns. Wayethatha abafundi ababeke ngomdonsiswano owawuphakathi kwemenenja kaDolly, uPaul Mitchell, neSundowns.
“Ngifisa ukubonga ithimba lezemidlalo leSolezwe okuyilona engisebenzisana nalo, ngaphandle kwalo bengingeke ngikwazi ukuwuthola umklomelo. Kuyajabulisa nokubona ukuthi ukusebenza ngokuzikhandla kuza nezithelo ezinhle,” kusho Mkhize.
Ezindabeni athe zimhlabe umxhwele azibhalile, ubala uhambo lwaseZambia lapho iSundowns yayibhekene khona neZesco United emdlalweni we-semi final yeCAF Champions League nyakenye.
“Indlela abaphila ngayo eZambia yakwenza kwacaca ukuthi cishe indlela yokuphila e-Afrika iyefana. Abantu bakhona bazithobile futhi bakhonze ubumnandi njengabalapha eMzansi.”
Usayilambele impumelelo njengoba esafuna ukungenela eminye imincintiswano emikhulu ngoba usafuna ukudubula abafundi ngamanye amabhomu ezindaba.
Umhleli weZemidlalo kwiSolezwe, uSihle Ndlovu, umhalalisele kakhulu uMkhize ngokuhlabana iminyaka ilandelana.
“Kuhlale kuyinto emnandi ukubona intatheli esencane kodwa ezimiselayo ihlabana ngenxa yemisebenzi yayo emihle. Siyaziqhenya kakhulu ngokwenziwe nguMkhize iminyaka ilandelana futhi siyamhalalisela. Akungabazeki ukuthi ikusasa lakhe liqhakazile kwezobuntatheli,” kusho uNdlovu.