Inkantolo ivune abafundi baseThekwini TVET
BAPHUME behleka bodwa abafundi baseThekwini TVET College emuva kokuphuma kwesinqumo sokuhoxiswa kwesicelo sokuthi baphume baphele ehostela lesikhungo esikhishwe yiNkantolo eNkulu yaseThekwini izolo.
Ngenyanga edlule umphathi walesi sikhungo, uMnuz Eugene Mchunu, ufake isicelo sokuthi inkantolo ikhiphe umyalelo wokuthi kukhishwe abafundi abahlala ehostela lesikhungo i-Asherville ngemuva kombhikisho wabafundi okuthiwa ubusunodlame.
Laba bafundi babefuna kuxoshwe umphathi ngoba bekhononda ngokungasetshenziswa ngendlela kwemali yesikhwama esibhekelele abafundi iNSFAS.
Abameli babafundi bafake amaphepha ukuphikisa isicelo. Izolo inkantolo inqume ukuthi sihoxiswe isicelo abafundi babuyele ezindaweni zokuhlala. Abameli babafundi nabamele uhlangothi lwekolishi bazohlangana ukuze babhale incwadi eyisivumelwano enemigomo abafundi abazoyilandela nokulindeleke ukuthi idluliselwe kubafundi emasontweni amabili ezayo.
Emasontweni amabili adlule, abafundi babambe isithangami nabezindaba lapho bathi bafuna kuxoshwe uMchunu futhi bemsola nangokuhluleka ukulinda isinqumo senkantolo ngodaba lokukhishwa kwabo. Bathi ngaphambi kokuba inkantolo inqume yena ubesevele eqashe onogada abahlukumeza abafundi, bebakhipha ezindaweni abahlala kuzo.
UMchunu uthe nakuba ebengakawutholi umbiko ngesinqumo senkantolo kodwa abekho abafundi abebekhishiwe ezindaweni abahlala kuzo.
“Engikwaziyo ukuthi kwamiswa ukufundwa ngoba isiteleka sabafundi sasinodlame sebeqala ukushisa nezakhiwo, okwenzeka isonto elilodwa. Kuwumthetho oshicilelwe phansi ukuthi uma ukufunda kumiswa, abafundi kumele baphume ehostela yesikhungo. Kodwa lokho akwenzekanga ngoba abameli babo bafaka amaphepha avimbela ukuthi bakhishwe kuze kube inkantolo iyanquma,” kusho uMchunu.
UMnuz Charles Diradingoe, osesigungwini esimele abafundi kuleli kolishi, uthe basithokozele isinqumo sokuthi bangakhishwa ehostela yesikhungo.
“Sikuthokozele ukuthi sesizoke sifunde ngokukhululeka yize sesiphazimisekile ezifundweni. Sizoqhubeka nokulwela abafundi ngoba sifisa ukuthola izimpendulo mayelana nokusebenza kwemali yeNSFAS,” kusho uDiradingoe.