Abamatekisi bafuna isixazululo sezingozi ngesiko
INYANGA uSepthemba ngafika ngayo emhlabeni wanganeno zingu- 15, ngisuka kowangaphesheya kwengcwaba. Abahlola ngezinkanyezi bathi sengibuya okwesithathu, uma ngihamba sengiyovunyelwa ukubuya okwesine osekuyoba okokugcina. Sebebathathu besho into efanayo. Inyanga lena evamise ukuthi kube nezinto ezingehlelayo ngayo ngibe ngitsheliwe ngazo. Angikuthathe ngikubhekise eMpumalanga, ngizonqotshwa empini yamadoda amathathu emsakazweni ngonyaka ka-1992 ngatshelwa kwenzeka. Ngikwaloliwe nakhona ngatshelwa ngayo le nyanga okwagcina kungehlele ngoLwezi. Emva kokwamukela umsebenzi wabadala bengibekelwa unyaka nonyaka okuyovela, okwami kube ukulindela. Angikuthathe ngikubeke kokwakamuva, ngonyaka ka-2015 ngatshengiswa amathwasa athize ukuthi angibheke eBhayibhelini bawasho ngamagama ukuthi leli liyokuba nguJudas leli liyokuba nguPetro. Nebala kwaba njalo ngoLwezi.
NgoFebhuwari nonyaka kwafika ikhehla lathi kulo nyaka iphupho lakho lizofezeka okade wawulilwela, uzohlangana nenhlangano enkulu yabanikazi bezimoto ezithutha abantu abayofuna usizo nolwazi ngalokhu esikuphakela khona imihla namalanga. Angikuthathe ngikubeke kokwanamhlanje: okwenzekile.
Ngo 2013 ngakhonjwa kwesokuba iHonorary Lecture eNyuvesi yaKwaZuluNatal ngaphansi kwesikole sezeNkolo, uBuciko baseMandulo, neNjululwazi. Ngingena ngaqala umshikashika wokucela ukuthi ngelinye ilanga ke kuvulwe ingosi yokufundwa kwesintu nezinto ezithinta amasiko ase-Afrika, inkolo, ukwelapha kwendabuko namagugu ethu. Kwaba yinkinga njengalokhu wazi amanyuvesi akithi asaphethe okwaphesheya kwezilwandle. USolwazi Nhlanhla Mkhize obengumphathi omkhulu wesikole sesifundo sezengqondo (Psychology) ubelokhu emile ekutheni indlela yasentshonalanga yokufundiswa kwalesi sifundo iyahluleka kumuntu omnyama wase-Afrika, ilapho aqhamuka khona nakubiza ngokuthi i-African Pschology. Besilokhu sibambisene naye kulokho. Lalela-ke njengoba ngikhuluma nawe sekuphothuliwe konke ngalesi sikhungo, osekusele ukuthi sivulwe ngokomthetho, sibizwa ngokuthi: Isikhungo se-Africology. Kulesi sikhungo ngikhonjwe ngaba iHonorary Research Fellow (okungukuhlonishwa okuphezulu kwezokucwaninga), okuyinto abayiveza ngoFebhuwari. Kulesi sikhungo kuzoqalwa ngokuthatha abafundi bezinga leMasters nelo budokotela kulabo abafuna ukucwaninga ngokwelapha kwakithi, inkolo namasiko ase-Afrika. Sizokwenza ama-seminars omakhosi befundiswa ngezinto ezithinta ezokwelapha namasiko. Lokhu kimina kungukuzuza into eyisimangaliso ezosiza kwezokwelapha ngoba silahlekile. Konke kudidene njengoba ucwaningo lwenziwa abamhlophe babonda babonda namhlanje sidlisa ngisho ingane ezelwe igobongo, sibe singachazi ukuthi yini yona le nto okuthiwa igobongo nomndiki nomndawe.
Okwesibili bengisekhaya eGoli uma ngisendleleni lungene ucingo komunye womakhosi esibambisene naye enhlanganweni yethu yabelaphi iSoaha, ukuthi inhlangano enkulu yamatekisi iSizwe Taxi Association ifuna ngizokhuluma nabo namalungu abo wonke ngesimo sezingozi ezenzeka emgwaqweni. Le nhlangano ingenkulukazi izimoto zayo ezinqamula izwe zisuka eGoli ziya eMpumalanga, eMpumalanga Kapa, naKwaNongomo. Sihlangane ngoLwesithathu emahhovisi abo kugcwele abanikazi bezimoto ababalelwa emakhulwini ayisishiyagalombili. Sabuya isibikezelo.
Ezingxoxweni ngikhulume kabanzi ngokuthi imoto iyini, iyaqiniswa noma iyashiselwa yini impepho? Umsebenzi wetekisi uma unawo ngabe owakho noma ukhona umnikazi wawo? Imoto lena iyini ngempela ekhaya nasesibayeni? Ezingxoxweni ngikhiphe inselelo yokuthi kufanele sibuye sihlangane nezikhulu lapho sizokhuluma khona ngokuthi siqale umkhankaso esizowubiza ngokuthi: I Operation: Bheka eMsamo, ngoba kuyacaca ukuthi izingozi ezivela emigwaqweni ematekisini ingoba sikhohlwa uMsamo owukhiye. Kuningi esikwenza sithenge imoto okungenziwa. Lokhu kuzofaka phakathi abanikazi nabashayeli. Kusasa inyuvesi engingeke ngiyigagule okwamanje ezokwethusa abaningi ngomlando wayo eseKapa seziphothuliwe izingxoxo nomnyango wayo weTheology ukuthi kusukela ngoMasingana ngonyaka ozayo iminyaka emithathu nginguSolwazi ozovakasha kuyo (Visiting Professor) ngelekelela ngokuvula iziqu zokucwaninga ngokwelapha kwendabuko namasiko nokuthi kuhlangana kanjani nenkolo.
Kuningi mfowethu nawe dadewethu abakusho ngoMandulo engiyokukhinindela khona sekwenzekile, eMsamo. Bathi sebehamba: Shesha, unake izibonakaliso namaphupho. Nanamhlanje ngisemi lapho.
ASIPHAHLE: UMsamo wobabamkhulu ungiphuphumela ingwebu yanamahlanje. (033-5691317/ 0797471911/ 0728972001