Phambili ngegxathu leLadysmith Black Mambazo
KUMELE lishayelwe ihlombe iqemu lomculo wesicathamiya lakuleli iLadysmith Black Mambazo ngokusungula indlela yokugubha iNyanga yamaGugu.
Kusukela nonyaka, iqembu selizoba nekhonsathi yesicathamiya njalo ngoSepthemba.
Ekhonsathini kuzosina kudedelane amaqembu esicathamiya.
Umculo wesicathamiya ungolunye lwezinhlobo zomculo ezasungulwa eNingizimu Afrika nokuwenza ubalwe nezinye zezinto ezingamagugu ezweni lethu.
AmaMbazo Amnyama nawo asezakhele igama futhi ahlonishwa emhlabeni jikelele ngomculo wawo asewine amaGrammy kwaze kwakane ngawo.
Aseke futhi acula nezihlabani zakwamanye amazwe okubalwa kuzo oDolly Parton, Paul Simon, Des’Ree no-Oliver Mtukudzi.
Nakuleli asecule nezintandokazi zabaculi njengeThe Soil, Lucky Dube neMi Casa.
Kungekudala iMambazo ihlanganyele noLira, Salif Keita waseMali no Kirk Whallum wase-USA benza ingoma yokuhlonipha iqhawe lomzabalazo u-Oliver Tambo.
Ngaphandle kokujabulisa abathandi bomculo wesicathamiya, abahleli bomcimbi, ozoba ngoSepthemba 30 e-Olive Convention Centre, bathi basophe ngawo ukubasa nokuvuthela uthando lwesicathamiya entsheni ngenhloso yokuthi nayo ikwazi ukuqhubeka nokunyusa izinga lawo.
Ukuthembisa kwabahleli bomcimbi ukuthi uyohlale uba KwaZulu-Natal, kuyatshengisa ukuthi bahambisana nokugcinwa kobugugu ngoba isicathamiya sidabuka kulesi sifundazwe.
Siwafisela inhlanhla amaMbazo Amnyama sengathi ikhonsathi ingayimpumelelo, idlondlobale nangeminyaka ezayo.
Isikhalo sawo sokuthi umculo wesicathamiya kawunikwa ithuba elenele eziteshini zomsakazo nezethelevishini sethemba sizozwakala futhi sithathelwe izinyathelo ngokushesha ngoba akusizi ukuthi siqhakambise okwezizwe amagugu esizwe sibe siwashaya indiva.