I-SACP ayikhohlwe i-ANC ibhekane nokwayo
loyo ofunwa umengameli ukuba kube nguyena othatha izintambo uma eseshiya ngoDisemba, uDkt Nkosazana Dlamini Zuma, kunalokho iseka uMnuz Cyril Ramaphosa.
Owami umbono uthanda ukwehluka kulokhu kungenelela kweSACP ezindabeni ezithinta ukuthi wubani okumele abe ngumengameli we-ANC ngoDisemba. Uma iSACP iwalalela amagatsha iningi lawo elizimisele ngokuthi izimele okhethweni olulandelayo, angisiboni isidingo sokuthi kube nomholi emkhankaselayo. Ngiyibuka le nto ikabili. Okuqala uma ngoDisemba engqungqutheleni ye-ANC kuphumelela uDkt Dlamini Zuma noma omunye nje umholi ngaphandle kukaRamaphosa ngiyaqinisekisa ngonyaka ozayo engqungqutheleni ekhethekile iSACP ethembise ukuyibiza lapho iyobuka khona ukuthi ikulungele yini ukuzimela okhethweni, iyosithatha isinqumo sokuzimela. Kungaba wukuthi izozimela kuzwelonke ngo-2019 okanye kohulumeni basekhaya ngo-2022.
Okwesibili uma kuphumelela uRamaphosa amagatsha kuyomele akhohlwe ngokuzimela kweSACP ngoba lokho kuyobe kusho ukuthi imisebenzi yabaholi beSACP abathunyelwe ezishayamthetho iphephile. Ngibuka kungekho shintsho esiyolubona emazingeni aphansi. Amagatsha eSACP ayoqhubeka acindezeleke njengoba kwenzeka manje ebuholini bukaZuma.
Sisesigabeni lapho siholwa khona ngabaholi abakhuluma izinto abangaziphili. Uquqaba luyasetshenziswa ukufezekisa izinhloso zabathile. Abaholi abasiholayo babukeka bengazimisele ngokuguqula isimo esiphila kuso – abantu abasebenzi negebe lokungalingani liya livuleka.
Uma iSACP ibathanda abantu mayikhohlwe ubuqembuqembu be-ANC ibhekane ngqo nezinkambiso zayo njenganohulumeni wakusasa. Ngiyaphinda, le yokuthi kube khona ethi iyameseka kwi-ANC ngikubona kuyinto efanayo neyenziwa ePolokwane.
Philani Zungu EZWELIBOMVU