Kuxwayiswa ngamaqola athembisa ngamathenda
AMAPHOYISA aKwaZuluNatal aphenya amacala okukhwabanisa athinta abantu abaqola osomabhizinisi bebathembisa amathenda angombombayi.
Okhulumela amaphoyisa KwaZulu-Natal, uCaptain Nqobile Gwala uthe abantu kumele baqaphele uma befaka izicelo zamathenda ngoba baningi abantu abazenza abasebenzi beminyango kahulumeni ekubeni bengesibo.
Ngokwesitatimende esikhishwe ngamaphoyisa esifundazweni, abantu kumele bazi ukuthi ukuze ukwazi ukufaka isicelo sethenda kumele ibhizinisi libhaliswe kulowo mnyango.
Abantu baxwayiswa ngokuthi abakwazi ukuhlomula ngethenda ngaphandle kokuthi bafake isicelo sokuyithola.
Abantu bayanxuswa ukuthi babazi abantu abaxhumana nabo uma kufakwa izicelo zamathenda eminyangweni noma uma abantu befuna ukubuza okuthile.
Isitatimende siveza ukuthi izigebengu zisebenzisa izincwadi ezinemifanekiso yeminyango kahulumeni (letterheads) ukuqola abantu abangasoli lutho.
Kuthiwa usomabhizinisi waziswa ukuthi uyitholile ithenda emnyangweni othize.
Kuthiwa kujwayeleke ukuthi kuthiwe usomabhizinisi akenze umsebenzi ongajwayelekile bese eyalelwa inkampani engumbombayi azothenga kuyo imikhiqizo, esuke isebenza ngaphandle kwesifundazwe usomabhizinisi asuke esebenza kuso.
Uhlelo olusetshenziswayo olokuthi umkhiqizo osuke uthengwa ngusomabhizinisi uzohanjiswa kulowo mnyango osuke umnike ithenda.
Osomabhizinisi kuthiwa bajwayele ukusebenzisa imali ephakathi kuka R100 000 noR400 000 uma bethenga imikhiqizo.
Kuthiwa osuke eqolwa uthengiswa eminye imikhiqizo ngezinye izikhawu kungakapheli isikhathi eside enze i-oda lokuqala kanti ushaye phansi, uyothi eqambe ebona ukuthi uyaqolwa, imali isuke isihambile.
Amaphoyisa anxusa abantu asebeke baqolwa ngale ndlela ukuthi bathinte isiteshi samaphoyisa esiseduze noma bathinte inombolo yokubika ubugebengu ethi 08600 10111.