Kuphelile ngoFreese ne-Eagles ehlulwa umqansa
KUPHELILE ngomshado ka-Allan Freese neRoyal Eagles egijima kwiNational First Division (NFD).
Leli phephandaba litshelwe ngumthombo walo othembekile ukuthi uFreese ugawulwe yizembe ku-Eagles.
“Kuphelile ngoFreese ne-Eagles, abaphathi bamkhululile. Lokhu bakwenze ngenxa yokuthi bebenganeme ngemiphumela yeqembu. Usihlalo weqembu uSbu Mpisane uvele akayena umlandeli omkhulu kaFreese.
Ibhola lakhe akalithandi. Wamthatha nje ngoba nakhu kuthiwa uzoletha imiphumela emihle ngaphandle kokudlala ingcwenga yebhola,” kusho uFreese.
UFreese ujoyine i-Eagles ngasekupheleni kwesizini edlule. Ungene endaweni kaKostadin Papic odabuka eSerbia. Ethintwa lo mqeqeshi uqinisekisile ukuthi usehlukene ne-Eagles.
“Ufunani kimina ngoba angiseyena umqeqeshi? Yebo, kuyiqiniso ukuthi sesihlukene neRoyal Eagles. Sihlukane izolo (ngeSonto). Ngikhethe ukuthi sihlukane ngemuva kwemiphumela engemihle,” kusho uFreese.
I-Eagles ayikaze inqobe selokhu kuqale isizini. Ihlezi endaweni yesibili uma usuka ekugcineni. Isidlale ngokulingana imidlalo emibili, yadliwa emidlalweni emibili.
Ngempelasonto idliwe yi-University of Pretoria ngo 2-1 emdlalweni ebihamba kuwona phambili ngo 1-0. Kowokuqala idlale ngokulingana noThongathi FC ngo 1-1 kwathi kowesibili yadliwa yiHighlands Park. Kowesithathu idlale ngokulingana ngo 1-1 neStellenbosch FC njengoba ngempelasonto iguqiswe amaTuks.
I-Eagles ihlezi endaweni yesibili ngamaphuzu amabili uma usuka ekugcineni. U-Angelo Tsichlas osethimbeni lezikhulu ze-Eagles uqinisekisile ukuthi umqeqeshi omusha uzokwethulwa maduze.
“Umqeqeshi uFreese sesihlukene naye. Sizomemezela omusha ngokukhulu ukushesha. Njengamanje konke sekusezandleni zikasihlalo weqembu. Ngingakuqinisekisa ukuthi sinenqwaba yama-CV esesiwatholile kubaqeqeshi abehlukene abafuna lo msebenzi,” kusho uTsichlas.
Leli phephandaba lihabule ukuthi i-Eagles igaqele uSerame Letsoaka. Isolezwe liphinde lathola ukuthi u-Owen Da Gama osanda kuhlukana neSouth Africa Football Association (Safa) ungomunye wabaqeqeshi abafake isicelo somsebenzi ku-Eagles.
Imizamo yokuthola uLwazi Mazibuko ophethe uDa Gama igcine ibhuntshile kwazise ucingo lwakhe belukhala lungabanjwa.
Kuvele ukuthi uDa Gama usifake ngesonto eledlule isicelo somsebenzi.