Usuthu lufuna ukuvuka ngeWits
UZITHWESE umthwalo onzima umqeqeshi waMaZulu, uCavin Johnson, ofuna ukuvuka ngompetha be-Absa Premiership, iBidvest Wits emdlalweni weligi ozoba kusasa ngo-7.30 ebusuku eKing Zwelithini Stadium, eMlazi.
Usuthu luhlazwe yiLamontville Golden Arrows ngempelasonto emdlalweni weligi ePrincess Magogo Stadium, KwaMashu. Leli qembu, elithenge ilungelo lompetha beNational First Division (NFD), iThanda Royal Zulu, lokugijima esigabeni esikhulu, livithizwe ngaBafana Bes’thende ngo 4-1.
Amagoli angcwabe Usuthu abhajiswe ezintanjeni nguLerato Lamola, Siphelele Magubane, Knox Mutizwa noKudakwashe Mahachi. Elokubika loSuthu lingqofelwe enethini nguSadat Ouro-Okoriko.
Ngemuva kwemidlalo emine Usuthu seluqoqe amaphuzu amane. Selushaywe imidlalo emibili, lwadlala ngokulingana kowodwa lwanqoba owodwa. Lubhabhadiswe yiChippa United ngo 2-0 ekuhambeni lwaphinde lwavithizwa yi-Arrows eMagogo. AmaZulu aqumbe phansi iFree State Stars ngo 1-0 eMlaza ase edlala ngokulingana ngo 1-1 neMaritzburg United enkundleni efanayo.
UJohnson udalule ukuthi iKing Zwelithini bafuna ukuyenza inkundla enzima ukuvakashela kuyona kule sizini ka-2017/2018.
“Yebo kuzoba ngumqansa ukukhuthaza abadlali ngemuva kokushaywa ngembudlu yamagoli. Amagoli amabili angene ngemizuzu yokugcina. Ngikholwa wukuthi amagoli ebesingawagwema. Ngeke ngizikhathaze kakhulu ngeWits, kumele sizihluphe ngathi. Asikaze sishaywe eKing Zwelithini. Sifuna ukuyenza indawo enzima ukuyivakashela kule sizini le nkundla.
“Sifuna ukuqoqa amaphuzu amathathu siphinde sidlale ibhola elihle kule nkundla. Nakulokhu sibheke iwini. Ngiyazi ukuthi kuzoba ngumdlalo onzima