Usafuna ithuba kwiPremiership
UNESIFISO sokubuyela kwi-Absa Premiership owayengumgadli weMaritzburg United, uDiyo Sibisi, oseyibambe kwi-ABC Motsepe amasizini ambalwa.
USibisi (35) waseSahlumbe, usebuya nasekubeni ngumqeqeshi kwi-ABC Motsepe. Utshele Isolezwe ukuthi usafuna ukuyoqhulula amagoli kwiPremiership kwazise ukholwa wukuthi kukhona abagadli angcono kunabo.
USibisi ugcine ukubonakala kwiPremiership ngesizini ka-2013 ekwiMpumalanga Black Aces. Emuva kwalokho kuvele izindaba zokuthi usethole iqembu eVietnam.
Isolezwe lizithele phezu kwakhe eqhulula amagoli kwiLadysmith United edlala kwi-ABC Motsepe ebikade idlala emqhudelwaneni i-Alfred Duma Local Municipality Mayoral Cup ebikade iseKandahar Stadium, eMnambithi, ngempelasonto. I-Ladysmith igcine iwine lo mqhudelwano ngo 2-0 ihlula iSahlumbe United kowamanqamu, yazihlomulela ngendebe no-R10 000.
“Ipali ngisalibona. Akukho okungangehlula. Isifiso sami wukuthola noma iminyaka emibili kwiPremiership noma kuNFD (National First Division). Emuva kwalokho sengingayeka ngempela,” kusho uSibisi.
“Nami angazi ukuthi ngigcine ngiphume kanjani esigabeni esikhulu, bengilokhu ngizitshela ukuthi kuzolunga, ngithi ngiyaxhumanisa kungalungi. Angazi noma inkinga ikimina noma babona ukuthi ngeke ngisakwazi ukushaya amagoli kodwa ngokwami baningi engingabehlula kwiPremiership.”
USibisi ungomunye wabagadli ababekade besatshwa kumasizini edlule. Uthe akamangali ngempumelelo kaFadlu Davids ayegadla naye kwiTeam of Choice. UDavids, onikwe ngokugcwele isikhundla sokuqeqesha iMaritzburg ekuqaleni kwesizini ka-2017/2018, akakaze ahlulwe kusukela kuqale imidlalo yeligi.
“Umdlalo nomdlalo weMaritzburg ngiyawubuka. Kwesinye isikhathi ngifikelwa yizinyembezi ngoba iyiqembu lami engaphatheka kahle kulona futhi ngenza kahle. Kwesinye isikhathi ngifikelwa wukuthukuthela kodwa okungiphatha kabi kakhulu wukuthi umuntu oqeqeshayo manje bengidlala naye. Kodwa ngiyamjabulela kakhulu,” kusho uSibisi.
Kulindele ukuthi uSibisi asize iLadysmith kwiNedbak Cup ezodlalwa amaqembu alesi sigaba kusasa ezinkundleni ezahlukene.