Kusinda kwehlela kuJali eBelgium

KUSINDA kwehlela kumdlali weBafana Bafana u-Andile Jali kwazise iqembu lakhe laseBelgium, iKV Oostende libhekene nenkinga yokunganqobi njengoba kuphinde kwenzeka lishayelwa ekhaya yiGent ngo 2-0.

Lo mphumela ubeka ezikaJali ekugcineni kwelog njengoba ibisishaywa okwesithupha emidlalweni yokuqala eyisikhombisa yeligi. Yize zizimbi lezi zindaba kodwa uthole injabulo uKeagan Dolly esiza iMontpellier inqoba okwesibili kule sizini lapho ishaye khona iTroyes ngo 1-0. Kuyona le ligi kusemnyama kuKermit Erasmus obengabonwa kwiRennes ishaywa ngo 1-0 uvela kwiNice ngonyazi lukaMario Balotelli.

ULebohang Phiri naye oseFrance udlale imizuzu engu80 iGuingamp iwina ngo 1-0 kwiLille okuyibeke endaweni yeshumi kwi-log

Akubanga mnandi kuBongani “Ben 10” Zungu odlale cishe wonke kodwa wehluleka ukusiza i-Amiens ishaywa ngo 2-0 uvela kwiOlympique Marseille.

Uwudlale wonke uMay Mahlangu oweqembu lakhe laseRomania iDinamo Bucuresti lidedela iCSU Craiova ebilandela emuva ngo 2-0 kodwa umdlalo waze waphela sezibambene ngo 2-2. Iqembu likaMahlangu libalwa namanye enza kahle kuleliya lizwe.

Udlale 75 wemizuzu uKamohelo Mokotjo weBrentford yase-England ibambana kuthula umoya ngo 1-1 neReading koweChampionship yaseEngland.

Ubesenkundleni nakulokhu uDino Ndlovu yanqoba futhi iQarabag ngo 2-0 kwiKapaz okuyibeke endaweni yesibili ku-log kodwa lokhu kusengashintsha ngoba kunomdlalo okusamele bawudlale. Lo mdlalo ubeqe njengoba bebedlala neChelsea ku-UEFA Champions League.

*Silobe lapha engakadlali uLebohang Manyama weKonyaspor ebibhekene nomthwalo wokuhlula izinkunzi zaseTurkey, iBesiktas, izolo ebusuku.