UZuke unethemba ngoTebogo Moloi
INJINI yeChippa United, uSandile Zuke, iyamethemba umqeqeshi omusha uTebogo Moloi ukuthi uzolibuyisela leli qembu ezingeni elaziwa ngalo.
UMoloi oyinkakha ye-Orlando Pirates, ugixabezwe ngelesi sikhundla ngesonto eledlule (kodwa uyibamba), engena endaweni kaDan Malesela okhonjwe indlela. Ezinyangeni ezedlule uMoloi usulile ekubeni yiphini likaMalesela kwiChippa, kwavela ukuthi bayashayisana ngendlela iqembu okufanele liqeqeshwe ngayo phezu kokuba bevumelana ngebhola elidlalwa yiChilli Boys.
Emdlalweni wokuqala kaMoloi esebhentshini leChippa, idlale ngokulingana ngo 0-0 nePlatinum Stars kowe-Absa Premiership eRoyal Bafokeng Stadium ngoMgqibelo. IChilli Boys isawine umdlalo owodwa kusukela kuqale isizini ka-2017/2018. Ihlule AmaZulu ngo 2-0 ekhaya emuva kokuvula ngesibhaxu sika 1-0 esithole kwiPirates. Ngesonto eledlule ibhaxatshulwe yiBaroka ngo 3-1 nokusolakala ukuthi yikhona okuxoshise uMalesela.
“Izinto azikahlangani kahle kodwa sesinomqeqeshi omusha. Ngiyethemba ukuthi kuzolunga ngokushesha. Okuhle ukuthi usitshelile ukuthi ngeke ayishintshe indlela esidlala ngayo kodwa ufuna sidlale siye phambili, sishaye amagoli nokuyiwona abesihlula,” kusho uZuke.
“Sinabadlali abasezingeni eliphezulu. Asifisi ukuzithola siphindela esimeni sangesizini edlule lapho besivika khona izembe. Ngicabanga ukuthi kuhle ukuthi sibhedelwe yizinto manje kusaqala isizini ukuze sizolungisa.”
IChippa izobhekana neSuperSport United emdlalweni weligi eLucas Moripe Stadium, ePitoli, namuhla ngo-7.30 ebusuku. Amatsantsantsa a Pitori aqale isizini ngegiya eliphezulu ngaphansi komqeqeshi omusha u-Eric Tinkler kwazise aselinde ukudlala kowamanqamu weMTN8 neCape Town City ephekwa nguBenni McCarthy. Ngaphezu kwalokho iSuperSport iyibambe kwiCAF Confederation Cup kwazise isesigabeni sama-quarterfinal.
“Siyazi ukuthi iSuperSport iyiqembu elinzima futhi elinabadlali abasezingeni eliphezulu. Kuzofanele sizibambe ziqine, sizame ukuthola amaphuzu. Siyadinga ukuqala ukuwaqoqa kungaze kuhambe isikhathi,” kusho uZuke.