‘Kade avalwa amadela amathumbu ezinkukhu’
AMADELA asepulazini iSalejee’s Farm ngaphandle kwaseGeorgedale, okunqunywa kuwo izinkukhu, amathumbu azo alahlwe emgodini acoshwe kuwo wumphakathi, sekunesikhathi eside avalwa ngabezempilo.
Kuthiwa ukusebenza kwawo bekungahambisani nemibandela ebekelwe ukusebenza kwamadela.
Okhulumela uphiko lukaMasipala weTheku olubhekele ukunukubezwa kwezemvelo okungaba nomthelela omubi empilweni yabantu, i-Environmental Health, uthe sekunesikhathi amadela avalwa. Umnikazi wawo wahlawuliswa waphinde wayalelwa ukuthi alungise izinto ezithile ngaphambi kokuthi avulwe futhi.
UMnuz Musawenkosi Mchunu we-Environmental Health uthe umangele uma ezwa kuthiwa kunamathumbu atholakala ngaphandle kwamadela epulazi.
“NgoLwesibili siyile epulazini siyobheka ukuthi kwenzekani. Umnikazi wepulazi usitshele ukuthi awakavulwa amadela futhi akazi kungani iphephandaba libhale ukuthi kunamathumbu atholakala khona. Singene ngaphakathi sangafica lutho olukhombisa ukuthi kunezinkukhu ebezinqunywa khona. Awukho umgodi obuvulekile kodwa sifice, izikhumba zeziklabhu ebezilahlwe endaweni evulekile engaphandle kwamadela. Uthe bezihlatshwe ngesikhathi benza izinto ezithile zenkolo ayilandelayo,” kusho uMchunu.
UMchunu uthe bazohlale belibheke ngeso lokhozi ipulazi ukuze baqinisekise ukuthi awuphulwa umthetho.
UMnuz Khaye Nkwanyana woMnyango wezoLimo KwaZuluNatal, uthe abahloli babo basazoya epulazini bayophenya kabanzi.
“Kunemithetho okumele ilandelwe ngamadela ukuqinisekisa ukuthi indawo abasebenzela kuyo ihlanzekile futhi isezingeni elifanele. Lokhu kwenzelwa ukuthi kuqinisekiswe ukuthi inyama ehlinzwa kuwo iphephile,” kusho uNkwanyana.
Ilungu lomphakathi elingathandanga ukudalulwa ebelicosha amathumbu epulazini, lithe bawaletha amabhakede ngoMsombuluko njengoba kwakuvunyelwene kodwa baxoshwa kwathiwa amathumbu aseyadayisa.
“Asizange siwashiye amabhakene ngoba onogada basitshela ukuthi aseyadayisa futhi adayiselwa abantu abathile hhayi noma ngubani.”
Umthombo weSolezwe osondelene nabaphathi bamadela uthe ngemuva kokuthi kufike abezindaba epulazini kwaqashwa ugandaganda owamboza umgodi ngenhlabathi.