Ngeke ngivume uJoyi enziwe isitebhisi: Dabula
IMENENJA yowayengumpetha we-International Boxing Federation (IBF) minimweight, uNkosinathi “Mabhere” Joyi, ikhahlela eyokwenziwa kukaJoyi isitebhisi sabafana abancane.
UJoyi (26-5-0), elinye lamabhokisa angaconsi phansi eNingizimu Afrika, usecelwe kaningi ngabalandeli bamankomane ukuthi awuyeke umdlalo ngenxa yokucabngela impilo yakhe. Kuvela ukuthi impilo ayiphilayo ngaphandle kweringi, efaka nophuzo oludakayo, yiyona eyenza ehlelwe yizinga. Ukukhonya kukaJoyi kuqale ukushabalala ehlulwa nguHekkie Budler empini yebhande le-International Boxing Organisation (IBO) ngo-2013.
Uzamile ukuvuka azithathe kodwa wakhala ngaphansi kuRey Loreto empini yebhande le-IBO light flyweight. UJoyi ugcine ukungena eringini nyakenye ehlulwa nguSimphiwe “Chain Reaction” Konkco kubangwa ibhande le-IBO mimimumweight.
Ngesonto eledlule uJoyi uchithe impi obekumele ayilwe nevukana uDeeJay Kriel ngo-Okthoba 21 ekhala ngokunganikwa isikhathi esanele sokuzilungiselela. Impi ibikade izobhulela amazolo ezomqhudelwano i-Featherweight Super Four ehlelwe yiGolden Gloves Promotions kaRodney Berman ebizwa nge-Four Go To War.
Imenenja kaJoyi, uSiyolo Dabula, iveze ukuthi iGolden Gloves ibathintile, impi yahlehliselwa uNovemba 25.
“Besingeke siyithathe impi ka-Okthoba ngoba uNkosinathi kade elimele nakuba abeGolden Gloves singabatshelanga lokho. Ngaleyo ndlela besikade sisemuva ngokuziqeqesha. Bavumile ukuthi silwe ngoNovemba 25 nakuba sisalinde inkontileka,” kusho uDabula.
“Ngeke sibavumele laba bafana abancane bamenze isitebhisi. Kusekuningi asezokwenza esibhakeleni. Sesivele simhlelele indawo yokujima eGauteng, sikhulumile noDamien Durandt, wavuma.” Mayelana nempilo kaJoyi eyindaba egudwini e-East London, uDabula, uthe: “Uyintatheli, ngeke ngikutshele ngalokho. Uma ukhuluma nabantu base-East London abasesibhakeleni bayazi. Ngeke ngivume futhi ngeke ngiphike ukuthi uphila kanjani ngaphadle kweringi. Engingakusho wukuthi uNkosinathi unabantu abamesekayo okuwumndeni wakhe, abangani nezihlobo. Kusukela ehlulwe nguBudler kuze kuba ukhala ngaphansi kuKonkco.”
UKriel (12-1-1) usanda kuwina ibhande le-World Boxing Council (WBC) International minimumweight ehlula uDexter Alimento wasePhilippines. Uzanyelwa izimpi ezizokwenza athole amava aphinde anyuke ezilinganisweni ze-WBC.