UPitso uyivivele impi neWaydad koweCAF
AKANAVALO lokubhekana nempi athi uyilindele enhla ne-Afrika umqeqeshi weMamelodi Sundowns uPitso Mosimane, iqembu lakhe izolo ebusuku elinikele eMorocco ukuyothuthana neWydad Casablanca emlenzeni wesibili we-quarterfinal yeCAF Champions League.
Umdlalo ungoMgqibelo ngo-10 ebusuku eMohammed V Stadium, eCasablanca.
Ngempelasonto iqembu likaMosimane lidlule ngo 1-0 emlenzeni wasekhaya eLucas Moripe Stadium, ePitoli, ngegoli elishaywe uYannick Zakri esiwombeni sesibili somdlalo.
Ephawula kuthelevishini ngemuva komdlalo uMosimane uthe umdlalo ubungelula.
“Asidlalanga kahle esiwombeni sokuqala. Ngidlalise abadlali abathathu esiswini uVilla (Sibusiso Vilakazi), uKeke (Hlompo Kekana) no-Oupa (Manyisa) ngoba ngizitshela ukuthi kuzosisiza lokho kodwa sibe sesilimala phambili njengoba uLeonardo (Castro) ubesala yedwa. Sishintshile safaka abadlali abathathu phambili, uLeo, uPercy (Tau) noZakri, salwa ukuze sithole umphumela esiwudingayo. Lincane igebe esihamba ngalo phambili kodwa ngincamela khona ukuthi sinqobe ngo 1-0 kunokuthi umdlalo uphele ngo 0-0,” kusho uMosimane.
IWydad ayisiwona amavukana njengoba iqede endaweni yokuqala eqoqweni layo ebelibophele i-Al Ahly yase-Egypt. Nyakenye kwale kancane ingene kowamanqamu walo mqhudelwano owagcina unqotshwe yiSundonws ihlula iZamalek yase-Egypt. Ngemuva kokuthi iCasablanca ivuthululwe yiZamalek ngo 4-0 emlenzeni wasekuhambeni kowandulela owamanqamu yafika ekhaya yavuka umbhejazane inqoba ngo 5-2.
Lokhu kukhomba ngokusobala ukuthi iSundowns kuzomele isebenze kanzima ukuze idlulele esigabeni esandulela owamanqamu.
“Khona akusekude sifike (kowamanqamu) yingakho ngithi kungcono ukuya kubona negoli elilodwa kunokuthi singaphathi lutho. Sizobagqilaza. Ngiyazi ukuthi kubhekwana kanjani namazwe asenhla ne-Afrika. Kumele uqonde usiko mpilo lwabo nendlela abacabanga ngayo. Ubabonile nje, ibhentshi labo lonke liza kithina, cabanga bazokwenza njani uma sesikubona? Kodwa ke anginavalo,” kuphetha uMosimane.
Uma iSundowns inqoba iWydad ikowandulela owamanamu izodlala ne-USM Alger yase-Algeria noma iFerroviaro yaseMozambique. La maqembu abambane ngo 1-1 emlenzeni wokuqala.
Kodwa izinhlelo zikaMosimane zikhomba ukuthi akanavalo ngokuthi ezakhe zisazoqhubeka nokuyibamba kulo mqhudelwano.
ISundowns njengoba ihambe izolo kulindeleke ukuthi ize ibuye kuleli ngemuva komdlalo womlenze wokuqala wama-semi final.
Kuvela ukuthi ngemuva kokudlala neWydad iqembu lizodlulela e-Algeria lapho linethemba lokuthi lizodlala ne-USM Alger kuma-semi final ngoSepthemba 29.
I-Alger ibambane ngo 1-1 neFerroviaro emdlalweni wabo wokuqala we-quarterfinal.