Unxeshezelwe ngo-R3m umndeni
INKANTOLO eNkulu eMgungundlovu inqume ukuthi unxeshezelwe ngoR3 million umndeni kasomatekisi owabulawa ngo-2009, okusolwa ngakho amaphoyisa akwaKito. UMnuz Bongani Mkhize, owayengusomatekisi, wayesoleka ekubulaweni kwenkosi uMbongeleni Zondi yaseNgome, eMsinga, ngo-2009.
Umndeni kaMkhize, usafuna kuxazululwe icala lokubulawa kwakhe. Lokhu kushiwo ngummeli womndeni uMnuz Petrus Coetzee weMason Incorporated izolo ekhuluma neSolezwe.
UCoetzee uthe yize umndeni ujabule ngokufika emaphethelweni kwesimangalo sokubopha uNgqongqoshe wamaPhoyisa kuleli ngezindleko zokushona kukaMkhize kodwa kuningi abasafuna kuphendulwe ngokubulawa kwakhe.
NgoMsombuluko inkantolo inqume ukuba umndeni kaMkhize unxeshezelwe ngokubulawa kwakhe okusolwa ukuthi kwenziwa ngamaphoyisa akwaKito ayephenya ubugebengu obuhleliwe. UMkhize wabulawa ngoFebhuwari 2009.
UMkhize wayenencwadi yasenkantolo evimbela amaphoyisa ukuba angamdubuli. Ngokwamaphepha asenkantolo, umndeni kaMkhize kumele ukhokhelwe le mali ngo-Okthoba 18 nonyaka, uma kungenjalo kuzoba nenzalo ka-10.25% ezolokhu yengezwa kuyo.
UCoetzee uthe bekusetshenzwa kanzima njengoba beze bakwazi ukufika kulesi sigaba. “Kuthathe iminyaka eminingi sisebenza ngokukhulu ukuzimisela ukuze umndeni uthole ukunxeshezelwa okufanele. Yize sikwazile ukuphumelela kulesi sigaba kodwa kukhona okusasele njengoba umndeni ufuna icala lokubulawa kwakhe nalo lixazululwe. Akekho osaboshiwe waze wagwetshwa ngokubulawa kukaMkhize,” kusho uCoetzee.
Ummeli walo mndeni uthe kukhona isikhathi lapho abakwaMkhize bebefika enkantolo bezothamela icala yize bebenovalo lokuthi bazohlaselwa.
“Bekungelula emndenini ngoba bebehlezi bethunukala amanxeba futhi benovalo. Bekuba khona izinhlobo nhlobo zabaphenyi, uthi usuqedile nalaba baphenyi kufika abanye abasha.
Ngaso sonke isikhathi bekungathi ubulawe manje uMkhize ngoba bekuphoqa ukuba umndeni uhlale ukhuluma ngalesi sigameko,” kusho uCoetzee.
Lo mmeli uthe ngokwamava akhe amacala afuze leli, imindeni ethintekayo isuke isifuna kuphele ngecala ukuze ikwazi ukuqhubeka nempilo.
Kuthintwa indodakazi kaMkhize izolo, ithe umndeni akukho ozokuphawula kwabezindaba, bakhulunyelwa ngummeli wabo kukho konke.
Ngokombiko wamaphoyisa ngesikhathi ebulawa uMkhize kwavela ukuthi wayekade edubula amaphoyisa.
Ngesikhathi umndeni wakhe ufuna ukunxeshezelwa, kwavela enkantolo ukuthi walahlekelwa ngumuntu owayengenisa imali ekhaya njengoba uMkhize nguye owayondla.
Emaphepheni asenkantolo abamangali kuvele ukuthi ngunkosikazi kamufi uNkk Fakazile Mkhize, izingane zakhe uZamambo, Nkosiphile, Siphathelwe noPhakeme.