Kuzocaca ngo-2018 ngebheyili yesiboshwa
KUZOCACA ngonyaka ozayo ngesicelo sebheyili sesiboshwa esesidonse iminyaka engu-14, abameli baso abafuna sikhishwe ngoba bekholwa ukuthi akubanga nobulungiswa ekuphathweni kwecala laso.
USibusiso Blose waseNanda obevele eNkantolo eNkulu yaseThekwini izolo, waboshwa ngo-2004 ngecala lokubulala owesilisa okuthiwa wayemduna imoto yakhe eNanda, elokuzama ukubulala nelokutholakala nesibhamu esingekho emthethweni nezinhlamvu.
INkantolo eNkulu yaseThekwini igwebe uBlose udilikajele ngalawa macala.
Kuvele ukuthi amarekhodi aphethe imininingwane ngaleli cala alahleka okwenze kwangaba lula ukuthi kufakwe isicelo sokubuyekeza isinqumo senkantolo.
Ummeli kaBlose, u-Adv Delen Banard uthe ufuna adedelwe ngebheyili, ngesikhathi inkantolo isalinde ukunquma ngosuku lokubuyekezwa kwecala.
Kuvele ukuthi abukho ubufakazi obabumxhumanisa nesibhamu esatholwa ngoba azikho izinsalela zeminwe yakhe ezatholakala kwisibhamu.
UMengameli wamaJaji u-Achmat Jappie uthe nakuba kuzwakala okushiwo ngabameli besiboshwa, kodwa kudingeka isikhathi esanele ukuze kubhekwe kahle amarekhodi.
“Kumele sikuqonde ukuthi isiboshwa sidonsela amacala abucayi. Kumele okungenani sibe nesikhathi esanele ukubheka amarekhodi. Sekujwayelekile ukuthi kulahleke amarekhodi bese kuthi oboshiwe afake isicelo sokubuyekeza icala, ngoba eneqiniso lokuthi icala lizochithwa,” kusho uJappie.
Unqume ukuthi isicelo sebheyili siphinde sibuyekezwe ngoJanuwari 22, ngonyaka ozayo.