Uyothekela ulwazi osiza umphakathi
UZOBUYA nolwazi oluzothuthukisa umphakathi wangakubo owesilisa ozocobelelana ngolwazi nentsha yakwamanye amazwe engqungqutheleni ezoba seMidrand, eGoli.
UMnuz Simphiwe Mataba (31) ongumgqugquzeli wezinhlelo zokusiza umphakathi kuMasipala waKwaNongoma, uzohlanganyela nezingcithabuchopho kwiYoung African Leaders Initiative (Yali) eqala ngoSepthemba 25. Le ngqungquthela yamasonto amane, izobe ihlanganise abantu abasha bamazwe akwiSouthern Region. UMataba utshele Isolezwe ukuthi ukukhulela endaweni esemakhaya kumenze wanothando lokusiza umphakathi ngoba ziningi izinkinga akhule ezibona.
“Yize ngibuye ngahlala eThekwini kodwa ngiyabazi ubunzima obubhekene nabahlala ezindaweni ezisemakhaya. Ukuhlala eThekwini kwenze ngavuleka amehlo, ngakwazi nokubona ezinye izindlela zokusiza. Nginothando lokusiza izingane, intsha nabesifazane njengoba ngike ngasebenza iminyaka eyisikhombisa enhlanganweni engenzi nzuzo, yomphakathi,” echaza. Inhlangano akhuluma ngayo yiShine yaseEngland, egxile ekuvikeleni izingane nezinye izidingo zomphakathi.
“Kuningi esikwenzile ukusiza umphakathi ngisasebenza neShine. Sikwazile ukusiza imindeni ephethwe yizingane kuphela, kwesinye isikhathi eminye ishoda ngomazisi. Namanje ngisenabo ubudlelwano neziphathimandla zaseEngland, ezibuye zilekelele ezidingweni zomphakathi wethu,” kusho uMataba.
Ukuthanda kwakhe ukuthuthukisa umphakathi wangakubo, kwenze wanqaba nethuba ebelizomenza asebenze eKenya kuyona iShine. Uthe wesula kule nhlangano ngoba engafuni ukushiya umphakathi wangakubo. Okumjabulisayo ukuthi nakuwona umasipala usebenza ngezinhlelo ezifanayo zokusiza umphakathi. Mayelana nethuba lokuya kwiYali, uMataba uthe uyibheke ngabomvu ingqungquthela ngoba uzobuya nolwazi olunzulu.
“Ngiyacabanga ukuthi izovula amathuba okusebenzisana namanye amazwe. Ukuhlangana nabakwamanye amazwe kuzongisiza ukuthola ulwazi ukuthi babhekana kanjani nezinye izinkinga zomphakathi,” kusho yena.
Kule ngqungquthela kuzoba khona nomcimbi wokuthweswa iziqu, uMataba azoba yingxenye yawo. Kuzophinde kube nezinkulumo mpikiswano ngezihloko ezahlukene ezithinta izinhlelo zomphakathi.
UMataba uneziqu zePublic Management azithola eMthashana FET College kanti kumanje wenza iBachelor of Administration eMancosa. Ngo-2014 wahlabana ngendondo emkhakheni weBest Rural Youth Development kumaSouth African Future Leaders Awards. Uhlelo lweYali lwethulwa nguMnuz Barack Obama owayenguMengameli wase-USA ukukhuthaza ubuholi entsheni yase-Afrika.