Kudlisa izimbali ezingenise emfashinini
KUZODLISA izimpahla ezinezimbali neziveza amahlombe kuleli hlobo njengoba seziqalile ukugcwala ezitolo.
Sekuze kwanetemu lembali yodumo kubathandi bezinkundla zokuxhumana, eliqhamuke nayo imfashini yalolu hlobo.
Le mbali eyi-rose elibovu, ingenise kuzo zonke izimpahla zokugqoka kwabesifazane nabesilisa.
Ingenise kakhulu kumajini nakumajakhethi eDenim.
Umsiki wengqephu we-Afrolicious Designs uMamsie Mkhwanazi, uthe isitayela sembali asingenisile ezitolo zakuleli kuphela kodwa kuyo yonke imboni yemfashini.
“Kusuke kwaduma kakhulu izimpahla ezinembali ebomvu kodwa zinedumela nje izimbali njengoba kuzongena ihlobo. Ingenise ngamandla imbali ebovu, okungenzeka futhi isheshe ibacike abanye. Kungakuhle abantu bangagxili kakhulu kulezi zimpahla ezinembali ebomvu kodwa bathenge nezinye izimpahla ezinezimbali,” uchaze kanje.
Uthe kuyisu elihle nokuthenga izimbali ezingamapheshi ukuze uyinamathisele engubeni, ukwazi ukubuye ukuyikhiphe uma ungasayithandi.
Lezi zimbali ezingamapheshi zingenisile ezitolo eziningi zemfashini futhi ungazinamathisela nange-ayina. Isolezwe lithole ukuthi imbali yodumo ayiqali ukuba nedumela kodwa ike yadlisa nangeminyaka yabo-1960.
Kuthiwa iqale ukuduma kakhulu nasezimpahleni zaseChina zakudala, yingakho nazo izimpahla ezinembali zibizwa ngeVintage Fashion.
Usaziwayo ongumethuli wamaIdols uSomizi Mhlongo, ungomunye wabangenise ngezimpahla ezinezimbali.
Ubonakale ngesudi namateku okunezimbali emshadweni kaMinnie Dlamini nomyeni wakhe uQuinton Jones ngempelasonto.
USomizi uyaziwa ngokulandelwa kakhulu ngabaningi ababukela kuyena ngokwemfashini.
Ngaphandle kwedumela lezimbali, kuleli hlobo kuzodlisa nezingubo eziveza amahlombe kwabesifazane. Lezi zimpahla zibizwa ngama-Off Shoulder. Yize kuthiwa zifanela noma ngubani, kuhle ukungawugqoki ubhodisi ngoba uvela kabi noma ugqoke onamabhande akhanyayo.