‘Osomabhizinisi abangajahi inzuzo’
UMENGAMELI weDurban Chamber of Commerce and Industry (DCCI), uMnuz Musa Makhunga, udonse ngendlebe osomabhizinisi ukuthi bayeke ukunaka inzuzo kodwa baqinisekise ukuthi banakekela umphakathi nabantu abasebenza eduze kwabo.
UMakhunga osanda kuthatha izintambo zokwengamela iDCCI uthe isikhathi esiningi osomabhizinisi bayaziqhelelanisa nomphakathi banake inzuzo nokuyinto okufanele ishintshe.
“Sifuna osomabhizinisi banakekele imiphakathi abasebenza kuyo baqinisekise ukuthi abantu bahleli kahle, imvelo iyanakekelwa kungakhiqizwa impahla elimaza imvelo nabantu ngoba kujahwe inzuzo. Osomabhizinisi kufanele bathuthukise umphakathi ngemikhiqizo yabo futhi baphathe kahle abasebenzi namakhasimende abo,” kusho uMakhunga.
Ubalule ukuthi uma osomabhizinisi begxila ekwenzeni inzuzo kuphela kusho ukuthi ngeke bazixazulule izinkinga zomphakathi.
“Akusiwo umsebenzi kahulumeni kuphela ukuqeda inhlupheko nezinkinga zomphakathi. Kufanele wonke amabhizinisi azibuze ukuthi yini ayenzayo ukuqinisekisa ukuthi sinomphakathi othuthukayo nabantu abanempilo engcono ezweni lethu.”
UMakhunga odabuka eMpangeni, uneziqu zobuthishela azithola eNyuvesi yaseZululand eminyakeni engu-30 edlule, uqale ukusebenzela izinkampani ezizimele ebhekelele ezabasebenzi njengoba eneziqu zeHuman Resources.
Usebenze emikhakheni ehlukene okuhlanganisa ezezimayini, ezokudayiswa kwemikhiqizo, ezamabhange neminye.
Ungumsunguli nomqondisi wenkampani ezinze eThekwini, i-HR Matters, eyasungulwa eminyakeni engu-11 edlule.
Utshele Isolezwe ukuthi uzoqhubeka nokubhekelela izidingo zosomabhizinisi abe yizwi labo uma kunemithetho ebathintayo eThekwini, KwaZuluNatal nakuzwelonke.
Phakathi kwezinhlelo anazo ubalule ukuqinisekisa ukuthi umnotho weTheku uyakhula ungenise imali engaphezu kuka9.8% emnothweni weNingizimu Afrika.
“Uma umnotho ukhula siyakwazi ukuqeda inhlupheko, ukungalingani kwabantu siphinde sidale namathuba omsebenzi. Sizoxoxisana nezinhlaka ezehlukene ngezinhlelo zokuqinisekisa ukuthi abantu abanamathalente esiwadingayo abasuki eThekwini baye eGauteng naseCape Town kanjalo sifuna nezinkampani zihlale lapha zingayi kulezi zifundazwe ezimbili,” kusho uMakhunga.
Ubalule ukuthi bazoqinisekisa ukuthi intsha inamakhono adingekayo ngoba iningi layo aliqashiwe ngenxa yokungabi namakhono adingeka ezimbonini.
Ugqugquzele nokuthi intsha ingene kwezobuchwepheshe ngoba izwe liyashintsha futhi bazokwenza isiqiniseko sokuthi imithetho eshaywayo ihambisana nebhizinisi kanjalo nokuthuthukisa umphakathi.
Kuzoba nezingxoxo namalungu omphakathi ukuqinisekisa ukuthi uyathokoza ngokwenzeka emabhizinisini kubhekwe nokuthi yikuphi okungalungiswa ukuze abantu basebenzisane nosomabhizinisi ukuthuthukisa iTheku.
Ukugcizelele ukuthi iDCCI ayimele osomabhizinisi abakhulu kuphela kodwa nabancane.
“Siyizwi labo bonke osomabhizinisi abancane nabakhulu. Uma kukhona izinkinga ezithinta osomabhizinisi abancane siyazilungisa futhi siqinisa ubudlelwano babo nezinhlangano ezixhasa ngokwezimali noMnyango wamaBhizinisi amancane. Sinezivumelwano zokuthuthukisa osomabhizinisi basemalokishini ngoba osomabhizinisi abancane bangumgogodla womnotho,” kusho uMakhunga.
Uthe bazokwenza konke okusemandleni abo ukuqinisekisa ukuthi osomabhizinisi abayishiyi inkaba yeTheku ngokuheha abatshalizimali nokusebenzisana nomasipala ukuze uqinisekise ukuthi libukeka kahle.
“Sinezingxoxo nabaphathi bedolobha zokubachazela ukuthi yini engenza inkaba yeTheku ihehe. Sinezinhlelo zokuthi kubuyiswe izindawo zokudla, ezokubuka imidlalo, ezokwehlisa ukoma nokulihlanza. Izinhlelo zethu ziyasebenza lapha ezitolo nasemahhotela agudle ulwandle njengoba kuhlale kuhlanzekile futhi namabhilidi ethuthukiswa. Sifuna inkaba yeTheku ibe yinhle ihehe abatshalizimali,” kusho uMakhunga.