Basakazi boKhozi ake nisiyeke ngesiNgisi emsakazweni wesiZulu
MHLELI: Kuyaye kuthi cosololo uma uzwa umsakazi ekhuluma anonge inkulumo yakhe ngezaga, izisho nezifenqo. Nokho kubonakala sekuyinsakavukela umchilo wesidwaba ukunonga ulimi lwesiZulu ngesiNgisi.
IGagasi FM ngumsakazo osebenzisa ulimi lwesiZulu nolwesiNgisi ngoba vele kuyilona ulimi oseluhamba phambili. Nokho ngivele ngibindwe yisidwa ngibambe ongezansi uma ngizophinde ngizwe umsakazi woKhozi FM ejobelela inkulumo yakhe ngolukaGeorge. Ngagcina uKhozi lugxile kolukaMageba.
Usuyaye uzwe amagama afana nelithi interview, trending, audition nelithi recap namanye amaningi. Esikhundleni sokuthi inkulumongxoxo, okusematheni, inhlolokhono, ukukha phezulu okungamagama esiZulu.
Kanti ngubani ozosimela thina maZulu noma thina bantu abasazigqaja ngobubona. Phela umsakazo kanye namaphephandaba esiZulu yizona zinto esithi noma sesiqala ukuhlwathuza kodwa zikwazi ukusibuyisa. Uthola umsakazi enza inkulumongxoxo ngesiNgisi aze ayoyiqeda nomuntu osaziyo isiZulu. Isivakashi sesivele siyekelwe nje sizithamundele size siqede ngesiNgisi. Lokhu kwenziwa kakhulu yilaba basakazi okuthiwa “bakhulu” bese kusishiya sikhexile thina ukuthi uqweqwe lonke lukhuluma isiNgisi emsakazweni wesiZulu.
Abasakazi boKhozi bayaye bazitshele ukuthi abalaleli ngeke bakwazi ukulalela ezinye iziteshi ngoba uKhozi selaba segazini kubalaleli kanti cha akunjalo uma uzobheka ukuthi bangaki abalaleli abalalela Ukhozi imini nobusuku uzothola ukuthi bayingcosana. Uyazi kuvele kuthi xhifi uma uzwa umsakazi woKhozi ebheda isiZulu. Abasakazi boKhozi uma bengazama ukulalela uhlelo lukaSbu noMroza lukhulu abangaluzuza.
Sicela abaphathi boKhozi bethathe abasakazi bezinhlelo ezibalulekile beyobaqeqesha ukuthi basikhulume kanjani isiZulu. Nalabo abasuke bebasha baqale babaqeqeshe kuqala ngaphambi kokhuthi bangene emoyeni. Abaphathi boKhozi abakhumbule ukuthi kukhona abalalela umsakazo ngoba bethanda umsakazi, abanye basuke bethanda izinto okukhulunywa ngazo ohlelweni, abanye kuba wumculo, abanye kuba wulimi nokunye. Bayabona yini ukuthi ukuphuka kokukodwa ukulahleka kwabalaleli?
Abasakazi ake banonge inkulumo yabo ngezaga, izisho kanye nezifenqo. Akukhathalekile ukuthi nisakazela bani, nina yenzani eniqashelwe khona. Kanti ngubani osezosenza ukuthi siziqhenye ngobuthina?Yebo singazilalela iziteshi zesiNgisi sigcine lapho sigcina khona kodwa asikhohlwa ukubuya sizolalela into yethu esizigqajayo ngayo. Ngeke silalele isiNgisi ngale sithi uma sesibuya sididwe yizinduku zesiNgisi sithi sizogeza ikhanda kodwa kuvele lingagezeki ngenxa yokuntuleka kwamacubane. Into eyenza ukuthi nize nikhulume isiNgisi wukuthi niyavilapha ukusebenzisa izingqondo zenu bese nibona isiNgisi sizoba yisixazululo.
KuMroza, Sbu Buthelezi, Ngizwe Mchunu, Zimiphi Biyela noTshatha Ngobe ngithi niqhubeke nje nokuqhakambisa ulimi lwethu futhi nilukhulise njalo. Themba Dlamini EMNAMBITHI