UMbalula utuse amaphoyisa kugwetshwa umbulali
UNGQONGQOSHE wamaphoyisa, uMnuz Fikile Mbalula, usencome amaphoyisa ngesigwebo esitholwe ngumlisa olahlwe yicala lokubulala umuntu obehlala eGlebelands owadutshulwa wabulawa enkantolo.
UMbalula ubephawula ngemuva kokugwetshwa udilikajele kukaMxoleleni Bhani (28) olahlwe yicala lokubulala uMnuz Sipho Ndovela owabulawa eNkantolo yaseMlaza ngoMeyi 2015. UBhani ugwetshwe ngoLwesihlanu oludlule yiNkantolo eNkulu eThekwini. Uphinde wagwetshwa iminyaka engu-12 ngecala lokubulala elenzeke kuleliya hostela ngoJuni 2015 lapho kwadutshulwa khona umlisa oneminyaka engu-40.
“Abaphenyi bethu benze umsebenzi omuhle kakhulu. Ngesikhathi ngivakashela eGlebelands ngoLwesihlanu kwakugwetshwa isigebengu esiyingozi sanikwa udilikajele. Kuthathe izinkantolo zethu iminyaka emibili ukugweba lesi sigebengu. Lokhu kufanele kutshengise abantu bakithi ukuthi ingalo yomthetho igcina isebenzile yize kungathatha isikhathi eside,” kusho uMbalula.
Uthe kufanele ukuthi wayengasebenzi yedwa uBhani ngesikhathi ebulala uNdovela owadutshulwa enkantolo kasikhombisa.
Uthe ulindele ukuthi ithimba lezobunhloli lisebenze kanzima ukuthola loyo owayengungqondongqondo ekubulaweni kwabantu.
Uthe abantu abasha kufanele bazicije ngemfundo bazame ukuphila impilo eyiyo ukuze bazithuthukise. Uthe uBhani ubeneminyaka engu-27 ngesikhathi enikela impilo yakhe ebugebengwini.
UMbalula uthe unethemba lokuthi namanye amacala afanayo asenkantolo azokhipha imiphumela efanayo.
Uqhube wathi unethemba lokuthi ukugwetshwa kukaBhani kuzoletha ukukhululeka emndenini nakubangani bakaNdovela.
UNgqongqoshe wezokuPhepha KwaZuluNatal, uMnuz Mxolisi Kaunda, uthe ayadingeka amaphoyisa azinikele ekususeni izigilamkhuba emphakathini.
Uthe isinqumo sasenkantolo sithumela umyalezo ocacile ezigelekeqeni– ukuthi ingalo yomthetho yinde futhi igcina ifinyelele ezigebengwini.