Ifomu kaShabba inika ithemba kwiChiefs
IFOMU yenxele leKaizer Chiefs, uSiphiwe “Shabba” Tshabalala, ikhomba ukuthi leli qembu lizophinde lithembele kulona njengoba lizodudulana neMaritzburg United engegayelwa mphako kulezi zinsuku.
Lo mdlalo we-Absa Premiership unamuhla eHarry Gwala Stadium, eMgungundlovu, ngo-7.30 ebusuku.
Kulindeleke ukuthi kusiphuke izidindi kwazise womabili amaqembu alambele amaphuzu agcwele ngemuva kokuwadedela emidlalweni edlule.
ITeam of Choice engakahlulwa, ibambane ngo 0-0 ne-Orlando Pirates kuyona le nkundla ngempelasonto edlule. IChiefs yona iwadedele isiwaphethe ibanjelwa ekhaya yiBidvest Wits ethole igoli lokulinganisa ngemizuzu yokugcina umdlalo waphela ngo 1-1 eFNB Stadium.
Igoli Amakhosi abehamba phambili ngalo belivalelwe phakathi uTshabalala ongomunye wabadlali abadala eqenjini kodwa injini yakhe esaduma kahle.
Uma ekhona eqenjini wenza konke okusemandleni ukulivulela indlela eya phambili ashaye namagoli. Leli goli bekungelesibili imidlalo ilandelana. Nguyena futhi owavula inkundla behlula iCape Town City ngo 2-0 ngesonto eledlule ngaphambi kokuthi umfana omncane uWiseman Meyiwa athole elesibili.
UTshabalala nguyena oshayele iChiefs amagoli amaningi ngesizini edlule elinye lawo alithole bebhekene nayo i-United eMgungundlovu, bedlula ngo 2-1.
Akungatshazwa ukuthi lo mphumela yiwona uShabba nozakwabo abazobe befuna ukubuyela nawo emuva ngaphambi kokwakumela iLamontville Golden Arrows ngoMgqibelo.
UDaniel Cardoso oyibamba emuva kwiChiefs ugcizilele elokubaluleka kokunqoba. Lo mdlali ubekhuluma kuthelevishini ngemuva kokubanjwa yiWits. “Kubi ukwamukela ukuthi umdlalo uphele ngo 1-1 sibe sidlalela ekhaya futhi kade bengasaphelele, ngenxa yokungagxili emdlalweni uze uyophela. Kumele sibhukule ngoba le nto yenzekile nangesizini edlule. Asikwazi ukuyiyekela yenzeke futhi ngoba nathi sifuna ukunqoba iligi,” kusho uCardoso.
Kulo mdlalo kuzobhekwa nokuthi umqeqeshi uSteve Komphela uyasishintsha yini isikimu sakhe, ikakhulukazi udonga.
UCardoso oyibamba noLorenzo Gordinho maphakathi, ubethole ithuba lokudlala kulandela ukuthola ikhadi elibomvu kukaEric Mathoso.
UPhilani Zulu udlala endaweni kaTsepo Masilela kuthi uKgotso Moleko abambele uRamahlwe Mphahlele kwesokudla.