Akanaxhala owashiya Usuthu lukhala ozodlala nalo namuhla
AKANANXA naMaZulu umdlali wasemuva weBidvest Wits, uSifiso “Choppa” Hlanti, ohlukane noSuthu kungasekuhle ngesizini edlule emuva kokuthi enqabe ukuvuselela inkontileka.
UHlanti waseNewcastle, wayekhona ngesikhathi Usuthu lugawulwa yizembe kwi-Absa Premiership ekupheleni kwesizini ka-2014/2015. Ungomunye wabadlali abaqhubeka nalo selugijima kwiNational First Division (NFD).
Emuva kokuthi leli qembu lihlulekile ukubuyela esigabeni esikhulu, uHlanti akavumanga ukuvuselela inkontileka. Maphakathi nesizini edlule ubolekiswe kwiWits izinyanga eziyisithupha zokugcina zenkontileka yakhe lapho efike khona wawina isicoco sePremiership neZitshudeni.
Namuhla eKing Zwelithini Stadium, eMlaza, uHlanti uzobhekana okokuqala nabaqashi bakhe bakudala, AmaZulu. Usuthu luzokwamukela iWits emdlalweni wePremiership ngo7.30 ntambama.
“Okwenzeka phakathi kwami naMaZulu sengikudlulisile, yibhola leli. Usuthu luyiqembu elikhulu ngaphezu kwami. Okubalulekile kimina ukusebenzela iWits ukuze sizame ukuthola amaphuzu amathathu,” kusho uHlanti.
“Ngiyazi ukuthi abalandeli babengafuni ngihambe ngoba bebazi izinto ebengibenzela zona enkundleni. Kodwa konke okwenzeka kuMaZulu kungikhulisile. Ngeke ngizifake ingcindezi yokufuna ukukhombisa abathize ukuthi yini engikwazi ukuyenza.”
Ngempelasonto edlule iWits ibuye sekuvalwe amehlo, yadlala ngokulingana ngo 1-1 neKaizer Chiefs.
AmaZulu aphuma esibhaxwini sika 4-1 asithole kwiLamontville Golden Arrows koweligi.
Usuthu lusawine umdlalo owodwa kwemine kusukela kuqale isizini ka-2017/2018. Luhlulwe kabili, lwadlala ngokulingana komunye.
Umqeqeshi uCavin Johnson uthe: “Ungabheki ukuthi iWits ayikaze iwine nowodwa umdlalo kule sizini, nayo inebhadi njengathi sibhekene ne-Arrows.
Uma ubuka imidlalo yabo, badlala ibhola elihle kodwa behluleka ukufaka ibhola enethini.”
“Bazoza kithina, kufanele siqaphele. Ukukhuthaza abadlali, kufanele sibheke iKing Zwelithini neminyaka engu-85 ezayo ukuthi sifuna ukuba kuphi kweminye iminyaka engu-85. Ngifuna ukuthi noma ngisethuneni ngibone AmaZulu kuPremiership.”
AmaZulu azodlala ngaphandle kukaSammy Darpoh odonsa isigwebo samakhadi aphuzi. Abathintekile nguSiyabonga Nomvethe, Michael Morton, Thembela Sikhakhane, Ovidy Karuru noRhulani Manzini.