Uhambe nabo bonke abadlali bakhe uPitso
UMQEQESHI weMamelodi Sundowns, uPitso Mosimane, uyaziwa ngokuhlelela imidlalo yakhe ngobunono bekati kanjalo nokuhlaziya izimbangi asuke ezobhekana nazo.
Ukuhamba kweSundowns ngokushesha ibhekise amabombo eMorocco akusiwona umdlalo nje kodwa lo mqeqeshi nethimba lakhe banezinhlelo ezinkulu ngaphambi kokubhekana neWydad Casablanca emdlalweni womlenze wesibili we-quarterfinal yeCAF Champions League.
ISundowns itheleke izolo emini eCasablanca lapho kuzoba khona lo mdlalo ngoMgqibelo eMohammed V Stadium ngo10 ebusuku ngokwesikhathi sakuleli. Izinhlelo zokucijela umdlalo zihlanganisa iziwombe zokuhlaziya ama-video emidlalo yezimbangi.
Iqembu lizoziqeqesha ebusuka ngo-9 ukuze lizijwayeze isimo elizobe lizodlala ngaphansi kwaso. Bazoziqeqesha kathathu - inamuhla, ikusasa nangoLwesihlanu ngesikhathi esifanayo. Izolo ntambama kuvele ukuthi iWydad ibinqaba ukunikeza iSundowns inkundla ezojimela kuyona.
Okunye okwenziwe uMosimane wukuthi kungabi khona umdlali azomshiya ngemuva njengoba behambe ngisho nalabo abekhala ngokuthi balimele.
“Bengishoda kakhulu phambili, bekungekho muntu ebhentshini yingakho ngigcine ngidlalisa uThabo Nthethe esiswini. Kuba nzima uma engekho uKhama (Billiat), (Anthony) Laffor noGeorge Lebese kodwa ekugcineni uqhamuka necebo. Yingakho ubone u-Oupa Manyisa esedlala phambili ngemizuzu yokugcina,” kusho uMosimane ngemuva komdlalo womlenze wokuqala eLucas Moripe Stadium ngempelasonto.
ISundowns okuyiyona evikela isicoco seChampions League esinqobe nyakenye, inqobe ngo 1-0 wegoli likaYannick Zakri, uMosimane amfake ngesiwombe sesibili. UZakri naye walulama ngemizuzu yokugcina ukuze adlale lapha.
UThulani Thuswa ukuqinisekisile ukuthi iqembu lihambe nabo oLaffor noKhama.
Uma iSundowns inqoba lo mdlalo okulindeleke ukuthi ube nzima njengoba kulukhuni ukuhlulela iWydad ekhaya, izodlulela kweyandulela owamanqamu. Kulesi sigaba ingase idlale ne-USM Alger yase-Algeria noma iFerroviaro yaseMozambique. La maqembu abambane ngo 1-1 emlenzeni wokuqala we-quarterfinal obuseMozambique. Nawo azodlala ngoMgqibelo e-Algeria ngo-7.30 ebusuku.
I-Alger ngokwezinhlelo, okubonakala sengathi uMosimane iyona abona engase badlale nayo kuma-semi final ayikehlulwa emidlalweni eyishumi. Emithathu edlule iyidlale ngokulingana. IFerroviaro nayo ayiyazi induku, yagcina ukuhlulwa ngoJuni kweyamaqoqo. Izinhlelo zeSundowns zikhomba ukuthi uma iphumelela ngeke isabuyela kuleli izoqhubeka namalungiselelo ayo khona enhla ne-Afrika kwazise umlenze wokuqala we-semi final usekuhambeni ngoSepthemba 29.
Khonamanjalo iSuperSport United ngoMgqibelo izobhekana neZesco yaseZambia ekuhambeni emdlalweni weCAF Confederation Cup.