‘Isifiso sami wukudlala eqenjini lika-A’
UFUNA ukulandela ezinyathelweni zezilomo zabadlali abaphekwe eWestville Boys High umfana omncane waseMpangeni u-Akuna Nkuna, oqokwe waba yiSuperSport Lets’s Play ka-Agasti, owenza ezibukwayo ebholeni lombhoxo, ezokusubatha neBasketball.
Isikole saseWestville sesizakhele igama ngokukhiqiza abadlali abaphelela ezingeni lomhlaba. Phakathi kwabadlali abadlule eWestville abadumile kukhona uChad Le Clos, oyingqwele kwezokubhukuda, Khaya Zondo, ongukaputeni wamaDolphins, Khaya Majola noMzamo Majola bobabili abagijima kuma-Sharks.
UNkuna (14) odlala i-centre noma ngasezinhlangothini ebholeni lombhoxo ufunda u-Grade 9. Ufike khona ngonyaka odlule. Bambona edlalela isikole sangakubo eMpangeni iGrantham Primary School. “Ibhola lombhoxo yilona engilithanda kakhulu. Empeleni umfundaze engiwutholile ukuzofunda lapha eWestville ngiwuthole ngemuva kokwenza kahle ebholeni lombhoxo. IWestville Boys ingibone ngesikhathi ngimele iqembu laKwaZuluNatal lika-A emqhudelwaneni ka-Under 12 eBloemfontein. “Ngijabule ngokuthola ithuba lokuzofunda esikoleni esifana nalesi. Ngizokhula njengomdlali ngiphinde ngikhule njengomfundi. Isifiso sami wukubalwa neningi labadlali abaphume lapha eWestville asebenza kahle ezingeni lomhlaba,” kusho uNkuna. UNkuna, onguthunjana kubo, ukhale ngokuthi uthwale kanzima ngonyaka wakhe wokuqala eWestville Boys High.
“Ngonyaka odlule bekunzima. IsiNgisi sami besidinga ukuthi ngithi ukusipholisha. Ngifunde kakhulu amabhuku nezincwadi. Njengamanje sengingcono kakhulu. Ngijabule futhi ngokuthi ngenza kahle ebholeni lombhoxo, Basketball nakwezokusubatha. Lapha esikoleni ezemidlalo zihlukaniswe ngokwezigamu zokufunda. Ngesigamu sokuqala kudlalwa iBasketball bese kuthi ngesesibili kudlalwe ibhola lombhoxo bese kuthi ngesesithathu kudlalwe ibhola lezinyawo neSevens Rugby. Ngesokugcina kudlalwa iBasketball,” kusho uNkuna.
Uthe uzimisele ngokwenza kahle ezifundweni zakhe.
“Sijima kabili ngesonto, sizilolonga ngoMsombuluko nangoLwesithathu. Ngezinye izinsuku sisuke siphansi phezulu nezincwadi. Isifiso sami esikhulu wukuthi ngidlale eqenjini lika-A lapha eWestville. Ekuqaleni konyaka ngenze kahle kakhulu ngesikhathi siyodlala eKapa kwiPaarl High Rugby Tournament. Sinqobe imidlalo emibili sadliwa kowodwa. Ukuqokelwa kwiLet’s Play kuzongenza ngibe ngumdlali ongcono kakhulu,” kusho uNkuna.