I-DA ifuna incazelo ngoluka-Apleni

I-DA icele uNgqongqoshe woMnyango wezaseKhaya uSolwazi Hlengiwe Mkhize ukuthi achaze kabanzi ngokumiswa koMqondisi Jikelele woMnyango wakhe uDkt Mkuseli Apleni.

“UNgqongoshe kufanele asitshele ukuthi kungani emise umqondisi.

“Uma izizathu zakhe zingaphambene nomthetho kufanele asitshele ngoba ukungaphumeli obala kwakhela umnyango igama elibi,” kusho uMnuz Haniff Hoosen weDA .

Uthe uMnyango wezaseKhaya udinga uzinzo ngoba igama lawo alilihle emuva kokunikwa komndeni wakwaGupta ubuzwe ngaphambi kwesikhathi.

NgoLwesibili uSolwazi Mkhize uthe ngeke akwazi ukukhuluma ngodaba lokumiswa kuka-Apleni ngoba ludingidwa ngaphakathi, ukuhlonipha imithetho yabasebenzi.

UHaniff uthe lokhu akwanele ngoba akukwazi ukuthi kumiswe umqondisi jikelele ngaphandle kwencazelo emnyangweni kahulumeni.

Inyunyana yabasebenzi uNehawu ikushayele izandla ukumiswa kuka-Apleni ikhala ngokuthi ubephethe ngesandla sensimbi.

Ummeli ka-Apleni uMnuz Sandile July uthe bazothatha izinyathelo zomthetho ngokumiswa kwakhe.

U-Apleni akusiye umuntu wokuqala ukumiswa emnyangweni kahulumeni njengoba uMqondisi Jikelele woMnyango wezaManzi neNhlanzeko uMnuz Dan Mashitisho esekhaya kanjalo nowoMnyango wezoLimo, amaHlathi nokuDoba uMnuz Mike Mlengana bemiswe ezinyangeni ezimbili ezidlule.

Kuphinde kwashiya noMqondisi Jikelele woMnyango wezokuThuthukiswa koMphakathi uMnuz Zane Dangor ekuqaleni konyaka emuva kokubheda kobudlelwano bakhe nongqongqoshe uNkk Bathabile Dlamini.