Ubuyiswe ngo-elethu esikhundleni
UBUYISELWE ngo-elethu kwesikaSihlalo weSantaco KwaZulu-Natal uMnuz Boy Zondi osekungokwesibili ephethe lesi sikhundla.
Okhethweni obeluvalelekile lokukhetha isigungu sobuholi obuphezulu benhlangano eCoastlands Hotel, eMhlanga, izolo, uZondi uphakanyiswe yizona zonke izifunda eziwu16 zenhlangano ebezimelwe yizithunywa eziwu-10 isifunda ngasinye. Ungomunye wabathathu ababuyele ezikhundleni zabo abebevele besesigungwini.
UZondi uthe zonke izinhlelo ababe nazo zokuthuthukisa imboni yamatekisi zisazoqhubeka.
“Ngibonga kakhulu kubafowethu bemboni abakhombise ukuthi basabethemba ubuholi bami. Esizoqinisa kakhulu kukhona ezokuxhumana embonini nokukhuluma nezinye izimboni ukwenza isiqiniseko sokuthi imboni yethu iyalekeleleka kwezezimali futhi iba ngephucuzeke kakhulu,” kusho uZondi.
UMnuz Jabulani Manqele ubuye waba nguNobhala jikelele, isikhundla ebesiphethwe nguMnuz Dumisani Ntuli, uManqele eyiPhini lakhe. Kwathi uMnuz Robert Kenny wayiPhini lakhe. uMnuz Jeffrey Ngobese ubuyele kwesokuba yiTraining Officer.
UMnuz Sifiso Mthethwa uqokelwe kwesokuba yiPhini likaSihlalo ebesiphethwe nguMnuz Bheki Mbambo kwathi uMnuz Bongani Mkhwanazi waqokwa kwesokuba nguMgcinimafa ebesiphethwe nguMnuz Zibele Keswa.
Osezokhulumela inhlangano esifundazweni nguMnuz Sithembiso Duma obekuyisikhundla ebesiphethwe nguMnuz Mandla Mzelemu.
Ngaphambi kokuthi kube nokhetho kuqale kwaba nomkhuleko EThekwini Community Church lapho bekukhulekelwa ukuthi ukhetho lube nokuthula. UZondi uthe kukhulu asebekwenzile ukuphucula nokwenza ngcono isimo embonini yamatekisi.
“Sibe yisifundazwe sokuqala ukuba nezindondo, amaSantaco KZN Awards lapho sihlonipha khona izifunda nososesheni abangaphansi kwenhlangano abenza kahle ngakwezokuphathwa kwabagibeli. Siphinde saba nezindondo lapho sihlonipha khona abashayeli abaphatha kahle abagibeli,” kusho uZondi.
Uthe basebenze ngokuzinikela ukuqinisekisa ukuthi izimvume zokusebenza zinikezwa abanikazi bamatekisi nokuqeda ukushaqwa kwamatekisi nguMasipala weTheku ngenxa yokugqoza kokukhishwa kwezimvume.
“Sizinikelile ekuqedeni izinxushushu kososesheni abaningi abangaphansi kukaSANTACO, eMpangeni, obekukhona kubo uMnuz Phillip Taaibosch noMnuz Bafana Magagula oyimeneja yamaqhinga kuzwelonke nobuholi benhlangano eGauteng.