‘Ijezi leDowns liyabasinda abadlali’
UMQEQESHI weMamelodi Sundowns, uPitso “Jingles” Mosimane, usole inqwaba yabagadli abayibambe kuBafana Ba Style kodwa asebenza kahle emaqenjini athathwa njengamancane ngokusindwa yijezi eqenjini lakhe.
Njengamanje iSundowns ibophele uYannick Zakri, Leonard Castro noKhama Billiat. Ibigaqele uJeremy Brockie weSuperSport United noLebogang Manyama obegijima kwiCape Town City.
UMosimane usole abagadli abadala beSundowns uRodney Ramagalela osegijima kwiPolokwane City, Edward Manqele, oyibamba kwiFree State Stars no-Eleazar Rodgers, odlala kuBidvest Wits.
“URamagalela ufikile lapha kwiSundowns kodwa wangagqama. Ijezi leSundowns liyasinda, ijezi eliphuzi lisinda impela. Buka manje udlala emaqenjini amancane useyawaqhulula amagoli. Ushaya amagoli cishe ayisishiyagalombili isizini nesizini. Wayelapha kwiSundowns washaya amagoli amane kuya kwamahlanu. Uyazi kungani ehlulekile wukushaya amagoli lapha wukuthi asikho isikhathi esiningi sokudlala uma ungawashayi amagoli. Uma engathola ithuba eliningi lokudlala lapha kwiSundowns mhlawumbe angashaya amagoli angaphezu kwalawa awashaya kula maqembu amancane adlala kuwona. Inkinga kwiSundowns wukuthi asikho isikhathi sokunika abantu amathuba. Imizuzu ewu-55 yanele ukwenza isinqumo. Kunabadlai abaningi abaseqophelweni eliphezulu. Uma uhluleka wukushaya amagoli emidlalweni emibili uqala ebhentshini kudlaiswe omunye,” kusho uMosimane.
URamagalela uvutha engabaselwe kwiPolokwane City, usanda kushaya amagoli amabili bedla iSundowns.
“Akusho ukuthi ungumdlali obhedayo. Ungumdlali okwaziyo ukushaya amagoli kodwa udinga isikhathi. KwiSundowns kumele usheshe ucacise ngamagoli ngoba asikho isikhathi sokujwayela. Iyona-ke inkinga enkulu ngokudlalela iqembu elikhulu. Uma ufike kuleli qembu kumele usheshe ungene egiyeni. “Uma uhluleka wukungena egiyeni ngokushesha usenkingeni. Abantu-ke bayaye bakugxeke bathi wamdedela buka manje ushaya amagoli eqenjini lakhe elisha. URodgers ushiye iSundowns wajoyina iPlatinum Stars. Ufike washaya inqwaba yamagoli. Buka manje kwiWits uyahluleka wukushaya amagoli. KwiPlatinum ubedlala njalo. Ngicabanga ukuthi yizona izinto abantu abangazibheki lezo,” kusho uMosimane.
Omunye umgadli uMosimane akhale ngaye nguManqele. “Uyamkhumbula uJabu Manqele? Wasishiya wajoyina iMoroka Swallows lapho sasikade simbolekise khona. Wayeshaya amagoli umdlalo nomdlalo. Kweminye imidlalo wayeshaya amagoli amabili kanti kweminye wayeshaya amagoli amathathu umdlalo ngamunye. Abantu babekhala bethi mqeqeshi kodwa uyenza kanjani le nto yokuthi udedele umgadli ofana noManqele. Buka wenzani manje. Wenza iphutha elikhulu. Samdedela waya kwiChippa United wafike washaya amagoli. Ngemuva kwalokho ujoyine iChiefs. IChiefs yiqembu elikhulu. Ngicabanga ukuthi uma engaphindela eqenjini elikhulu futhi uzoqala phansi ashaye amagoli. Le nto ihamba ngokuthi udlala eqenjini elikhulu noma eqenjini elincane yini. Akulula emaqenjini amakhulu kufana naseqenjini lesizwe. Ngemuzuzu ewu-45 kwenziwa isinqumo manje ngawe. Uma ukhishiwe kwafakwa omunye umgadli wafike washaya igoli, lo oshaye igoli nguyena ozoqala umdlalo olandelayo,” kusho uMosimane.