Usathukile ocishe wahamba nabengozi
USATHUTHUMELA obekufanele ahambe nezihlobo zakhe aye emcimbini kodwa wagcina engahambanga kanti imoto izovelelwa yingozi edlule nemiphefumulo yamalungu omndeni ayisikhombisa KwaMaphumulo ngeSonto.
UMnuz Nkosentsha Ncalane uthe namanje akazi ukuthi yini eyenze waqoka ukungayi emcimbini obekuya kuwo amalungu ayisikhombisa omndeni wakhe. Engozini kushone indodana yakhe uSamkelo Ncalane (17) obefunda uGrade 8 eZephania High.
Bonke abayisikhombisa batakulwe sebeshonile emuva kokuthi iToyota Venture abebehamba ngayo ikhalakathele edamini iMvutshana.
UNcalane uthe ubesegezile eselungele ukuhamba aye emcimbini kodwa wabuye wazizwa engasakulangazelele wathi abamshiye. Uthe umfowabo omncane uPhumlani ubesuka eNsuze ehamba noWonder bezobalanda.
“Ngeke ngithi kukhona into ebingitshela ukuthi ngingahambi kodwa ngizwe sengathi ngingazihlalela nje. Ngesikhathi sebehambile kudlule isikhathi ngathola ucingo lungibikela ukuthi imoto isingene emfuleni. Ngithukile ngesikhathi ngizwa le nto ngaphuthuma ngayobheka. Ngimangele ngesikhathi ngifika ngingaboni moto emfuleni futhi nabo ngingababoni. Ngisheshe ngalahlekelwa yithemba lokuthi basaphila,” kusho uNcalane.
Uthe ngesikhathi efika bese kuvele kukhona abantu namaphoyisa belinde ukuthi kufike ithimba labatakuli obekuyilo ebelizosiza ukukhipha abebesemanzini.
Uthe ubenethemba lokuthi uzobabona uma sebebuya emcimbini. Uthe indodana yakhe ingene endlini yathi ukuhlala kancane.
“Usukume wayovula umsakazo wadlala amaSoul Brothers. Kwangena uPhumlani wacela ijakhethi ngathi akayithathe ngoba naye ethi uzobuya nayo ntambama kanti ngeke esabuya,” kusho uNcalane.
Uthe namanje izinhliziyo zabo zisebuhlungu kakhulu ngenxa yengozi edlule nabantu abaningi ngesikhathi esisodwa.