UZikalala uhlabe umbono kaMantashe
USIHLALO we-ANC KwaZuluNatal uMnuz Sihle Zikalala ugxeke uNobhala Jikelele we-ANC uMnuz Gwede Mantashe ngokuthi athi uMengameli Jacob Zuma kufanele anike izintambo iphini lakhe.
UMantashe uveze umbono wakhe kuTwitter ngeSonto.
UZikalala utshele amalungu e-ANC esifundeni iMusa Dladla, Empangeni ukuthi uMantashe akufanele eseke uhlangothi olulodwa njengomholi.
“UNobhala Jikelele uthi uma i-ANC ingakhethi iPhini likaMengameli ukuthi lingene esikhundleni sokwengamela inhlangano izoba nenkinga. Awukwazi ukuba noNobhala Jikelele ohambisana nohlangothi oluthile futhi ongenayo intando yabantu. Kufanele avuleleke kuwo wonke amalungu e-ANC, alalele nemibono ehlukene,” kusho
uZikalala.
Uthe bazoqhubeka nokweseka uDkt Nkosazana Dlamini Zuma ukuthi aphathe ngoba ungumakadebona emzabalazweni.
“Awukhethi noma ngubani ukuthi aphathe kodwa uqoka umuntu ozobumba inhlangano, alwe nenkohlakalo nokuqashwa kwabantu ngobuhlobo nezinye izingqinamba. Njengamanje sifuna inkululeko yomnotho, sifuna umholi ozothuthukisa impilo yabantu bakithi,” kusho uZikalala.
Uthe uDkt Dlamini Zuma ngumholi ozobumba i-ANC alethe nentuthuko yomnotho ngoba abamnyama basasele ngaphandle.
UZikalala uthe i-ANC idinga umholi ozohlala nabantu kukuhle noma kukubi hhayi ozohamba uma kukhona angakuthandi, abuye uma isimo sesihambisana naye.
“Umlando we-ANC ubhalwe phansi, abantu ababezibona bengamaphini kamengameli ngo1994 kwathi uma behlulwa bashiya kwi-ANC. Labo bantu ngeke bayibumbe i-ANC ngoba abakwazi ukubekezela uma izikhathi sezinzima,” kusho uZikalala.
UDkt Dlamini Zuma naye ugxeke uMantashe ethi awukho umthetho we-ANC othi uma kuqokwa umengameli kufanele kuchazwe kabanzi ngalesi sinqumo.
Ukhale ngokuthi uqhekeko luqala uma abantu bakha izinto ezingekho bengalandeli umthethosisekelo we-ANC.
“Umthethosisekelo uthi zonke izikhundla zivulelekile. Yingakho njalo emuva kweminyaka emihlanu siba nokhetho. Awukho umthetho othi kunesikhundla esibekelwe umuntu oyiPhini likaMengameli,” kusho uDkt Dlamini Zuma.
Unxuse abantu ukuthi babumbane emuva kwengqungquthela kaDisemba yokukhetha ubuholi.
“Uma sesihamba engqungqutheleni yokukhetha ubuholi kufanele sisebenzisane nabaqokiwe,” kusho uDkt Dlamini Zuma.