Usafuna ukulwela ibhande lomhlaba ozidlele amahlanga
UFISA ukulwela isicoco somhlaba sokugcina umpetha we-International Boxing Organisation (IBO) flyweight, uMoruti “Babyface” Mthalane, ozidlele amahlanga ku-Isaac Quaye waseGhana ngempelasonto.
UMthalane, owayengumpetha we-International Boxing Federation (IBF) flyweight, uhlule uQuaye ngomcacamezelo womngqimuzo womlalisa phansi ngomzuliswano wesibili empini ebiseRamosa Community Hall, eMohlakeng, eGauteng, ngeSonto. Ngalezi zimpi bekuhloswe ukuhlonipha owayengumpetha womhlaba uPeter “Terror” Mathebula. Bezihlelwe yiVictory Sports.
UMthalane ucacise zibekwa ukuthi ufuna ukusheshe aqede ngoQuaye enamathisela izibhakela ezinzima. Lokhu kwenze uQuaye wavuma phansi ngomzuliswano wesibili wamlamulela unompempe. Impi bekungeyemizuliswano engu-10.
Ngemuva kwempi, uMthalane, ekuqaleni konyaka oveze ukuthi usezowagaxa emgibeni amagilavu, uthe usafuna ukubhekana nomunye wompetha bamabhande amakhulu. Kusafanele avikele ibhande le-IBO.
“Ngifuna ithuba lokulwela elinye lamabhande amakhulu. Ngifuna ukubhekana nomunye wompetha bezicoco zomhlaba ezifana neWBC (World Boxing Council), WBO (World Boxing Organisation) ne-IBF (International Boxing Federation (IBF) ngaphambi kokuyeka isibhakela,” kusho uMthalane.
Ibhande le-WBC liphethwe nguDiago Higa waseJapan, ele-WBO lisezandleni zikaSho Kimura waseJapan ele-IBF liphethwe nguDonnie Nietes wasePhilippines kuthi ele-WBA libe sezandleni zikaKazuto Loka waseJapan.
Ngesikhathi enikwa ithuba lokuzibongela uMathebula, owayengumpetha weWorld Boxing Association (WBA) flyweight, uthe ufuna uMthalane athokozise abantu ezimpini zakhe ngoba lo mdlalo uhambisana nalokho.
Umqeqeshi kaMthalane, uColin Nathan uthe: “Sinomshayisibhakela ophambili esigabeni se-flyweight. Sizozama ukumhlelela ezinye izimpi, sizomhlelela ezintathu ngonyaka.” Empini yebhande leWBO Inter-continental bantamweight ebise-Orient Theatre, e-East London, uLusanda Komanisi, uhlulwe ngomngqimuzo womlalisa phansi nguJhack Tepora wasePhilippines. UKomanisi uyiqale kahle impi ebukeka esafunda imbangi yakhe. Nokho isibhakela sakwesokudla sikaTapore ngomzuliswano wesibili siyibhekise phezulu imilenze kuKomanisi.