OweLockdown uthi kuzoshisa phansi

UMLINGISI osezakhele ugazi kubabukeli ngekhono lakhe lokushiya ababukeli bekhexe imilomo, uthi kusekuncane abasakubonile ngaye, ikhono lakhe langempela bazolibona kahle emdlalweni okhuluma ngempilo yasejele, i-Lockdown.

Engxoxweni ekhethekile neSolezwe uLinda Sebezo uthe ufihle induku emqubeni ngendawo azobe eyilingisa kaMaki Magwaza.

Eshaya ugabigabi, uthe uzobe esatshwa kulo mdlalo njengoba eyisigebengu esizohlala sodwa ekhulukuthu ngenxa yesihluku esinaso kwabanye abantu.

“Kuzo zonke izindawo esengike ngazilingisa lena ihluke kakhulu. Emidlalweni engike ngabonakala kuyo ngidume ngokufaka izinkophe, ukumodela nokukhuluma kakhulu, ngibe umlingisi ophaphile kodwa kulokhu kuhlukile,” kuchaza uLinda. Uqhube wathi: “Ngize ngaphoqeleka ukuthi ngigunde ikhanda ukuze ngifane nse nalo mlingisi engizobonakala ngiwuyena,” kuchaza yena.

Ngesikhathi etshelwa ngoMaki, uLinda uthe akacabanganga kaningi wavele wavumela phezulu.

“Bengitshela ukuthi ngithole indawo engizoyilingisa angibuzanga mibuzo eminingi, ngajabula futhi ngazitshela ukuthi ngibhekene nomsebenzi onzima wokulingisa indawo ehlukile,” kuchaza yena. Kulo mdlalo uMaki ubonakala efika ejele labesifazane

iThabazimbi, evalwe ubuso, elenga amaketanga. Kucacela noma ngubani ukuthi uyisigebengu esiyingozi.

Ezinye izigebengu zabesifazane zisala zidumele uma zimbona efika ejele ezotoka nazo. Eziqeshini ezikhonjiswe abezindaba ngesonto eledlule eGoli, kulo mdlalo kubonakala sengathi izinto zizoshuba kule sizini yesibili ebhalwe yaqondiswa uMandla N. I-Lockdown izoqala ngo-Okthoba 9 kuMzansi Magic DStv (channel 161), ngo-8 ebusuku.

Isithombe: SITHUNYELWE UTHEMBISA into ehlukile kunajwayele ukubonakala eyilingisa kweminye imidlalo uLinda Sebezo ozobonakala emdlalweni i-Lockdown elingisa indawo yesiboshwa esiwumgulukudu esisatshwayo

UMCULI wowokholo uSgwili Zuma useqale ibandla iWinner’s House Community Church