‘Asinayo inkinga ngoDkt Dlamini Zuma’
OWAYENGUNGQONGQOSHE wezokuThuthukiswa koMnotho, ezokuVakasha neMvelo KwaZulu-Natal, uMnuz Mike Mabuyakhulu futhi osethimbeni elikhankasela uMnuz Cyril Ramaphosa ukuthi abe ngumengameli we-ANC, uthe akanankinga uma uDkt Nkosazana Dlamini Zuma eqokwa njengePhini likaMengameli engqungqutheleni yokukhetha ubuholi be-ANC ngoDisemba.
UMabuyakhulu, owakhishwa esikhundleni sakhe ngo-2015 kwangena uSihlalo we-ANC uMnuz Sihle Zikalala, uthe amalungu e-ANC akufanele asebenze ngokwezinhlangothi ezithile kodwa kufanele aqoke abaholi abaqotho abazowahola.
“Amaqabane e-ANC angamaqabane enhlangano, uma i-ANC ikhetha ukuhlanganisa abaholi kufanele kuvunyelwane ngoba asihambisani nokuthi kube nezinhlangothi ezihlukene kwiANC.
“Uma amaqabane ebona ukuthi uDkt Dlamini Zuma ufanele ukuwahola asinayo inkinga nalokho,” kusho uMabuyakhulu.
Engxoxweni ekhethekile ne-Independent Media emhlanganweni weSouth African National Civic Organisation obuseMpangeni ngoMsombuluko, uthe uRamaphosa usaxoxa namagatsha ahlukene ukubheka ukuthi ngubani okufanele abe yiphini lakhe.
“Noma yiliphi iqabane le-ANC elibonakala lizokwazi ukwenza umsebenzi lizoqokwa,” kusho uMabuyakhulu.
Akathandanga ukudalula amagama abangase babe
ngamaphini kaRamaphosa njengoba ethe lezo zinqumo zithathwa ngamagatsha.
Uthe akanawo amagqubu ngokukhishwa esiShayamthetho ngoba bonke ababehambisana nowayenguNdunankulu waKwaZulu-Natal uMnuz Senzo Mchunu bakhishwa ezikhundleni zabo emuva kokuhlulwa kwakhe engqungqutheleni yokukhetha ubuholi yango-2015.
Abahlulwa ngo-2015 beseka uRamaphosa njengoba kuyiwa engqungqutheleni yokukhetha ubuholi ezoba ngoDosemba.
“Inhloso yethu akusikhona ukuhlukanisa i-ANC kodwa wukuyibumba. Sifuna i-ANC ithole abaholi abazimisele ukusebenzela abantu,” kusho uMabuyakhulu.
Uthe uyafisa ukuthi abaholi be-ANC KwaZuluNatal inkantolo ethole ukuthi baqokwa ngokungemthetho bahlanganise inhlangano.
Uma ubuholi be-ANC kuzwelonke bukhetha ukuhlakaza obaKwaZuluNatal uMabuyakhulu uthe isisombululo kuye kungaba wukuthi kuqokwe uhlaka oluzohlanganisa abaholi bazo zombili izinhlangothi ebezilwa.