I-Cosatu iqinisa idolo amalungu ayo ngesiteleka
UMFELANDAWONYE wezinyunyana zabasebenzi iCosatu usutshele amalungu awo ukuthi awangasabi ukuthi azobanjelwa imali noma aqondiswe ubugwegwe ngokuteleka usuku olulodwa ngoba isiteleka sisemthethweni.
UNobhala weCosatu KwaZulu-Natal, uMnuz Edwin Mkhize, uthe akekho umsebenzi ongaphansi kweCosatu ozothathelwa izinyathelo ngoba nakhu etelekile.
“Silindele amalungu ethu avela kuzona zonke izinyunyana ukuthi abe sesitelekeni esizomisa yonke into eThekwini namhlanje. Isiteleka sisemthethweni ngakho akekho ozoxoshwa noma athathelwe izinyathelo ngokulova kwakhe,” kusho uMkhize.
Ukusho lokhu izolo ekhuluma esithangamini nabezindaba eThekwini lapho ebekhuluma khona ngemashi ezosuka epaki kuBotha iphelele enkabeni yedolobha yokulwa nokulahleka kwemisebenzi, ukuhamba kancane kokuqokwa kwekhomishini ezophenya ngokulawulwa kombuso yidlanzana, inkohlakalo kuhulumeni nokuqedwa kwamalabour brokers.
Uthe balindele amalungu avela kwiSadtu, Nehawu, Denosa, Ceppawu, Cwu, Cwusa, Limusa, Sactwu, Satawu, Sasbo, Popcru, Num, Pawusa, Sama neSafpu.
Uqhube wathi balindele nalabo abangasebenzi njengoba intsha eningi ingasebenzi.
“Inqwaba yabaneziqu ayisebenzi. Abantu badiliziwe yingakho sithi noma ngubani wamukelekile. Lokhu sikwenza ngoba sifuna ukutshengisa uhulumeni ukuthi sekwanele sifuna zilungiswe izinto esikhala ngazo ezinye zazo osekunesikhathi sikhala ngazo,” kusho uMkhize.
Uthe umbiko wakamuva mayelana nobubha kuleli ubalula ukuthi uhhafu wabantu bakuleli bayahlupheka. “Asikwazi ke ukuthi singahlala sithule abantu behlupheka. Kumele sisukume silwe nokuthi abantu bathole imisebenzi ukuze baphume ebubheni,” kuqhuba uMkhize. Uthe uma ingaphenywa ngokushesha eyokulawulwa kombuso yidlanzana izinkampani zizoqhubeka zidilize abasebenzi.
“Yingakho sihlaba ikhwelo lokuthi uZuma (umengameli) akasheshise ngekhomishini ezophenya izinsolo zokulawulwa kombuso yidlanzana. Lokhu siyazi ukuthi akuyona into entsha yingakho simile kwelokuthi akayenze ngokushesha.”
Uthe izinkampani zikahulumeni zitakulwa enkingeni yemali ngezimpesheni zabasebenzi bahulumeni.
Uhlu lwezikhalo luzonikwa uNdunankulu uMnuz Willies Mchunu, iDurban Chamber of Commerce noMnyango wezabaSebenzi.