Iphephile imali yabasebenzi: Matjila
ISIKHULU esiphezulu sePublic Investment Corporation (PIC), uMnuz Dan Matjila, sithi iphephile imali yabasebenzi futhi ngeke bayisebenzise budlabha.
UMatjila usho lokhu esithangamini nabezindaba ebesiseGauteng izolo ngemuva kwemibiko ethi uhulumeni uhlela ukusebenzisa impesheni yabasebenzi ukutakula izinkampani eziwayo okubalwa kuzo iSAA, Eskom nezinye.
“Impesheni yabasebenzi bahulumeni iphephile, senza umsebenzi omuhle wokuyinakekela. Sike sixoxe nezinkampani zikahulumeni ezidinga ukubolekwa imali kodwa ayikho inkampani esesivumelene nayo ukuthi sizoyiboleka imali,” kusho uMatjila.
Uthe abasebenzi bahulumeni kufanele bakhululeke ngoba imali yabo iqashwe ngeso lokhozi.
UNgqongqoshe weziMali, uMnuz Malusi Gigaba, uthe akakaze aboleke imali kwiPIC futhi akagxambukeli ezindabeni zokuphathwa kwayo.
“Azikho izinhlelo zokusebenzisa imali yabasebenzi bahulumeni budlabha. Angikaze ngicele uxhaso futhi abasebenzi kufanele bazi ukuthi imali yabo iphephile akukho okubi esikuhlelayo,” kusho uGigaba.
Uthe imphatha kabi imibiko yabezindaba ehudulela phansi igama lakhe ngoba yena akagxambukeli ezindabeni zokuphathwa kwezinkampani zikahulumeni.
UMqondisi jikelele woMnyango weziMali, uMnuz Dondo Mogajane, uvumile ukuthi iSAA okufanele ikhokhe isikweletu sika-R6.8 billion isike yaxoxa nePIC ifuna ukubolekwa imali.
“ISAA iqale ukuxoxa nePIC ngoMeyi ifuna ukutakulwa kodwa asikho isivumelwano okwafinyelelwa kuso. Ngalesi sikhathi kwathiwa kuno-R1.8 billion kuphela ongasiza iSAA kwabonakala ukuthi ngeke usize ngalutho,” kusho uMogajane.
Uthe kuke kwaba nohlelo lokuthi makudayiswe amasheya akwaTelkom ukuze kulekelwe izinkampani zikahulumeni.
“Mayelana nodaba lokutakula iSAA sisabheka ukuthi yiluphi uhlelo esingalwenza. Asikaze kodwa sicele ukuxhaswa ngo-R10 billion. Sisaxoxa nePIC nabanye abangase basitakule,” kusho uMogajane.
IPhini likaNgqongqoshe weziMali, uMnuz Sfiso Buthelezi, uziphikisile izinsolo zokuthi kunabantu abafuna ukususa isikhulu esiphezulu sePIC.
“Abekho abantu abafuna ukukhipha isikhulu esiphezulu esikhundleni. Ibhodi linamalungu awu-13, mathathu kuphela aqokwa nguNgqongqoshe. Imali yabasebenzi bahulumeni iphephile,” kusho uButhelezi.
INehawu ikwamukele ukuthi akukho mali yabasebenzi ezoxhashazwa.