UMthembu weseke okushiwo wuMantashe ngesikhundla

USOTSWEBHU we-ANC ePhalamende uMnuz Jackson Mthembu uvikele uNobhala jikelele we-ANC, uMnuz Gwede Mantashe ngokumemezela ukuthi ufuna kungene bani esikhundleni sokwengamela i-ANC.

UMthembu obekhuluma namakholwa ebandla i-United African Apostolic Church eVenda ngempelasonto, uthe uMantashe unelungelo lokusho ukuthi ngubani ongangena esikhundleni sokwengamela i-ANC.

Utshele abantu ukuthi akukaze kube nokuxokozela ngesikhathi uMengameli we-ANC uMnuz Oliver Tambo esenikeza uMnuz Nelson Mandela izintambo, yena wazidlulisela kuMnuz Thabo Mbeki, owazidlulisela kuMnuz Jacob Zuma ngo-2007.

“Uma uMengameli Zuma engafuni ukunika izintambo iPhini lakhe uMnuz Cyril Ramaphosa kuzoba nenkinga,” kusho uMantashe.

Uthe amalungu e-ANC azokhetha umengameli we-ANC hhayi umuntu wesifazane noma wesilisa.

UMantashe ugxekwe nguSihlalo we-ANC KwaZulu-Natal uMnuz Sihle Zikalala emsola ngokuthi akafuni ukulalela imibono yamanye amalungu.

“Ngihambisana noGwede Mantashe ngakushoyo. Kungumthetho we-ANC ukukhetha iPhini likaMengameli ukuthi lengamele inhlangano #SIYAVUMA100%,” kusho Mthembu.

Uthe uNobhala unelungelo lokusho ukuthi uthanda bani ukuthi aphathe isikhundla sokwengamela inhlangano.

UMnuz Derek Hanekom owayeNgungqongqoshe wezokuVakasha, uthe nguRamaphosa ongahlanganisa i-ANC, athuthukise nezwe.

URamaphosa ufuna isikhundla sokwengamela i-ANC benoDkt Nkosazana Dlamini Zuma.

UMgcinimafa we-ANC uMnuz Zweli Mkhize noNgqongqoshe wezokuHlaliswa kwabantu uNksz Lindiwe Sisulu nabo baphumele obala basho ukuthi bakulungele ukuhola i-ANC kanjalo noMnuz Jeff Radebe noMnuz Mathews Phosa. NoSihlalo we-ANC uNksz Baleka Mbete onguSomlomo wePhalamende naye usigaqele esokuhola i-ANC.