Iziyalo zikadokotela osenamabhizinisi
USOMABHIZINISI osemnkantshubovu uyale abesifazane ukuthi bangazami ukuzenza amadoda ukuze bazwakale. UDkt Judy Dlamini (osesithombeni) onePhd kwiBusiness Leadership, ukusho lokhu ecobelela osomabhizinisi engqungqutheleni yabo ehambisana nokuvulwa kweEssence Festival eThekwini. UDkt Dlamini owaqala waba ngudokotela owelaphayo eMlaza, uthe kwakunzima engena kwezamabhizinisi ngeminyaka yo-2000 kodwa wabekezela.
“Bekuthi uma ungena emhlanganweni ufice abesilisa babelungu kuphela. Bekungithusa lokhu kodwa ngasizwa ukungazishintshi ubumina. Ukukhula ngaphansi kobuhlungu bobandlululo kwangenza ngafunda ukubekezela. Esikhundleni sokubalisa ngobandlululo, ngathatha yonke intukuthelo ngayikhiphela emfundweni.”
Eyala abesifazane uthe akulona iqiniso okuhlala kushiwo ngabo ukuthi yibona abenza ukuthi bangaphumeleli emabhizinisini. Uthe inkinga ukuthi abesifazane bayilwa bodwa impi yokulingana. Uveze ukuthi yize kukhona osekushintshile kodwa akwanele njengoba izibalo zisakhomba ukuthi abesilisa yibo abaphumelela emabhizinisini.
“Okubalulekile bantu besifazane ukuthi ninake imizimba yenu, nondle nomphefumulo ukuze niphumelele. Ukondla umphefumulo akukona okwamakholwa kuphela kodwa kuyasiza noma kubani ukulwa nezinselelo. Uma ungadalwanga nokuzethemba, ziqeqeshe ukuze ube nakho. Akudingi ube nodlame noma uzenze indoda ukuze uzwakale kodwa okubalulekile yilokhu okushoyo,” kusho uDkt Dlamini.
Ekhuluma ngokubekezela kwakhe, uthe waqala ukuba ngudokotela eminyakeni engu-20 edlule. Uthe washada enza unyaka wesine, waqala ukusebenza ekhulelwe indodakazi, evele esenendodana eyayinezinyanga ezingu-18.
“Kukho konke lokhu angizange ngivilaphe kodwa ngasebenza ngokuzikhandla kungelula.” Uthe wayevele enephupho lokuba nePhd esakhula kodwa uze wayithola eseneminyaka engaphezu kweka-50. Unxuse nokuthi abantu babahloniphe abasebenzi basezindlini, athe abakutholi ukunconywa okubafanele. Uthe badela ukuba seduze nezingane zabo ukuze banakekele imindeni yabanye abantu.