Imeya ithembisa abafufusayo
IVULWE ngengqungquthela yosomabhizinisi i-Essence Festival izolo eNkosi Albert Luthuli ICC eThekwini, ebuyise ithemba kwabasafufusa.
Le festiveli evulwe ngokusemthethweni iMeya yeTheku uNkk Zandile Gumede, ibithanyelwe nayizivakashi zakwamanye amazwe. UNkk Gumede ozishaye isifuba ngokubeka phambili osomabhizinisi abasafufusa, uthembise ukuthi ziningi izinhlelo eseziqalile zokubafukula. Ibiphambili indaba yokuguqula isimo somnotho, imeya ethe umasipala uhambisana nayo.
“I-Essence Festival iyahambisana nekhwelo elashayelwa uMengameli (Jacob Zuma) ngokuguqula isimo somnotho ngoba nayo izohlomulisa abesifazane, intsha nalabo abebencisheke amathuba phambilini. Ngeke sikwazi ukukhuluma ngeTheku ngaphandle kokubala izindawo ezisemakhaya namalokishi, yingakho nayo le festiveli siyihambise nakulezi zindawo. Sifuna abantu baseThekwini bahlomule ezinhlelweni zikamasipala ngaphandle kokubheka ukuthi bahlala kuphi,” kuchaza imeya.
UNkk Gumede uthe kubekwe eceleni u-R1.3 billion ukubhekela izinhlelo ezizofukula umnotho eminyakeni emithathu eThekwini. Uncome uhlelo lukamasipala lokukhokhela ngqo abezinkontileka abaqoqa udoti, athe yibhizinisi ebelibangwa kakhulu. Engqungqutheleni kube nengxoxo ebixube izikhulu zeTheku nosomabhizinisi abazimele ukuchushisana kulo mkhakha.
UMnuz Mondli Mthembu onguSihlalo weNgqalasizinda nezokuHweba kuMasipala, uthe ukuguqula umnotho sekuqalile ukubonakala eThekwini.
Uthe ngesikhathi begcotshwa ngo-Agasti kwakunenkinga yokubanga ukwabiwa komsebenzi, kukhona osomabhizinisi abakhala ngokuncishwa amathuba. Uveze ukuthi leyo nkinga isiyaxazululeka ngezinhlelo ezintsha zeTheku.
Usondonzima kwezamabhizinisi uMnuz Vivian Reddy uthe kuyihlazo ukuthi iNingizimu Afrika yima iyicabanga manje indaba yokuguqula isimo somnotho.
“Izinto zonakala kudwetshwa uMthetho-sisekelo eminyakeni engu-23 edlule. Kuningi okwashiywa ngaphandle okulimaze umnotho wezwe. Isimo somnotho singaguquka kuphela uma amabhizinisi enikezwa abantu abasezingeni eliphansi abasafufusa,” kusho uReddy.
Ugcizelele ukuthi osomabhizinisi asebekhulile kumele batshale imali ekuqeqesheni nasekuthuthukiseni intsha.
UMnuz Eric Apelgren obhekene nokuhlanganisa iTheku namadolobha akwamanye amazwe, uthe isifiso esikhulu ukuthi amanye amazwe avulele uxhaso entsheni yakuleli ukuze ibe ngosomabhizinisi.
Ingqungquthela yosomabhizinisi iyaqhubeka namuhla lapho kulindeleke uNgqongqoshe wezokuThuthukiswa koMnotho KwaZulu-Natal uMnuz Sihle Zikalala. Iyingxenye ye-Essence Festival ezophothulwa ngeSonto.