Sekuzoba nephilisi elisha elishibhile elithithibalisa iHIV
ININGIZIMU Afrika seyizohlinzeka elinye iphilisi elilodwa elisemishanguzweni yokuthithibalisa igciwane lengculazi ama-antiretrovirals (ARVs).
Leli philisi eliyinhlanganisela yemishanguzo emithathu engama-ARV, iTenofovir, Lamivudine neDolutegravir (TLD) kulindeleke ukuthi liqale ukuba khona ngo-Ephreli ngonyaka ozayo.
UNgqongqoshe wezeMpilo uDkt Aaron Motsoaledi, uthe usebenzisane nezinhlangano ezahlukene zaphesheya ukuqinisekisa ukuthi leli philisi liyatholakala kuleli ngemali encane.
Kulindeleke ukuthi elakuleli longe imali elinganiselwa ku-R11 billion eminyakeni eyisithupha ezayo ngokuletha leli philisi elisha.
Bangaphezu kuka-3.4 million abantu abathatha imishanguzo yokuthithibalisa igciwane lengculazi eNingizimu Afrika
INingizimu Afrika bese ivele ihlinzeka iphilisi elilodwa elakhiwe ngamaphilisi amathathu, iTenofovir, Emtricitabine ne-Efavirenz.
IDolutegravir, elinye lamaphilisi ahlanganiswe kuleli philisi elizoqala ukuba khona ngonyaka ozayo ayinazo izinkinga eziningi ezigulini ezilithathayo.
Lisetshenziswa yiziguli ezisemazweni asethuthukile e-Europe nase-United States of America.
Eminye imishanguzo yokuthithibalisa igciwane lengculazi ivame ukudalela iziguli izinkinga eziningi zezempilo kokunye izigulise kakhulu zize zigcine seziqoke ukuyeka ukuyithatha.
INingizimu Afrika yilonazwe okukholakala ukuthi lithenga imishanguzo eminingi yokuthithibalisa igciwane lengculazi – lokhu sekusize namanye amazwe asafufusa ekutheni athole imishanguzo ngemali encane.
“Ngaphandle kokonga imali ukulethwa kwale mishanguzo kuzosiza iziguli. IDolutegravir iphilisi elinamandla nelingabi nazo izinkinga kakhulu kwiziguli. Iziguli zizokwazi ukuthatha ngendlela efanele imishanguzo yazo,” kusho aboMnyango wezeMpilo.