Okumhlaba umxhwele ngoQhosha
ULUNGISWA Deborah Hlongwana ngomunye wabantu besifazane abayizinduna zabalandeli bakamaskandi.
Le ntokazi ingumlandeli wokuqina wesihlabani somculi kamaskandi uQhoshangokwenzakwakhe Sibisi osewole inqwaba yezindondo, okubalwa kuzo iBest Gospel Maskandi kumaSABC Gospel Music Awards ngo2015/16 nakwiBest Newcomer kumaSatma Awards ngo2014. UCHARLES KHUZWAYO udlane indlebe nayo intokazi engapheli kuma-video ezingoma zikaQhoshangokwenzakwakhe okubalwa kuzo ezithi Yamnamathela Ne, Osozimali neZiqhomo.
CHARLES (CK): Ngubani uLungiswa?
LUNGISWA (LH): NgiwuLungiswa Deborah Hlongwana oyingane yesibili ezinganeni ezazintathu zikamama. Ngingowesine ezinganeni eziyisikhombisa zikababa. Abazali bami nguNomakhwezi Princess Hlongwana noMakhwenkwe Innocent Tshoba. Ngidabuka eMzimkhulu, eRiverside eBovini isigodi kodwa ngihlala eDassenhoek, eMariannhill. CK: Ufunde kuziphi izikole? LH: Ngafunda amabanga aphansi eBovini Primary naseSidikideni Primary. Amabanga aphezulu ngawafunda eDassenhoek High, okuyisikole engigcine kuso.
CK: Ukhona umsebenzi owufundele? LH: Awukho CK: Kukhona lapho osebenza khona? LH: Bengisebenza egaraji eliseChatsworth, ngiwu-cashier. CK: Uhlonipha kuphi futhi ubusiswe ngezingane ezingaki? LH: Yize ngingakagani kodwa nginezingane ezimbili, okungoYanga noYamkela bakwaMbhele. CK: Lesi singqazu sihlangana kanjani nomculo kamaskandi? LH: Ngaqala ukulandela umaskandi ngo-2004, ngilandela uMgqumeni okwathi uma edlula emhlabeni ngalandela Osaziwayo.
CK: UQhosha uqale nini ukumlandela?
LH: Kwakuwu-2014, sasiye esikhumbuzweni seBhova (uMgqumeni), sihambe naye uQhoshangokwenzakwakhe oyiqhawe lami namanje.
CK: Yikuphi ofike wakuthuthukisa kubalandeli bakaQhosha?
LH: Akukho esengifike ngakushintsha okwamanje ngoba ngisemusha kulesi sikhundla. Osekuzuzwe yiqhawe wukuthi abalandeli balo babe nomfaniswano, ukumeseka nokumphelezela lapho eyonandisa khona.
CK: Mangaki amagatsha eseninawo?
LH: Okwamanje sisenegatsha lalapha eThekwini kodwa sinabo abalandeli nakwezinye izindawo. Sisazovula amagatsha nakwezinye izindawo
CK: Yiziphi ezinye izinduna ezingaphansi kwakho?
LH: Asikabi nazo, sizoba nazo khona maduze.
CK: Yimiphi imibala eniyisebenzisayo?
LH: Sisebenzisa o-purple nomhlophe. Sawukhetha ngoba besifuna into ehlukile, into yethu. Lowo mbala siwususele kwikhava ye-CD yalo iqhawe, i-Bakery. Kuyo ligqoke lo mbala.
CK: Bakuteketisa ngaliphi igama?
LH: Bangiteketisa ngoZiqhomo, okuyigama elisuselwe kwingoma ethi ‘Noma ungapholisha iziqhomo zize zibe-pink, ufake amazipho amade angangawokhozi.’ Yimi engilingisa kwi-video yayo.
CK: Kubo bonke abaculi, yini wakhetha iqhawe lakho uQhosha?
LH: Sisuka kude nalo iqhawe lami. Liyazimisela futhi linobuhlakani. Njalo nje emcimbini ulindela okuhlukile. KwiMpucuzeko nyakenye, langena liyisangoma. Kulo nyaka lingene liyirasta kanti kwiNgqwele KaMaskandi lingene lithwele impuphu ekhanda okwachaza izihlwele. Likhipha ama-albhamu angamanoni njalo nje. Unama-CD amane eyokuqala yayithi Point To Prove eyaba inenoni elithi Iziqhomo, kwaba yiCompetition eyayinenoni elithi Kukhona Into Enganakwa Kodwa Ecikayo, Nansi Indoda Ikotela Umkami Ithi Iyambingelela. Yamnamathela Ne. Kwazoba yiTop 10, eyayinenoni elalithi Bamthathile Osozimali. Kwase kuba yiBakery enenoni elithi Lamavukane Asemaningi Ayangidida. Sashutha ama-video kuwo wonke amanoni futhi yimi olingisa kulawo ma-video kaQhosha. Sathola nezindondo ezine kuma-albhamu amathathu.
CK: Yikuphi ukudla okukhonzile?
LH: Ngikhonze ukudla kwesintu njengesigwaqane, isitambu, usu, ujeqe, yinyama yokosa neyaseNandos
CK: Ngaphandle komculo kamaskandi nokaQhosha, yiluphi olunye uhlobo lomculo olukhonzile?
LH: Ngikhonze umculo wokholo.
CK: Ngaphandle kukaQhosha, yimuphi omunye umculi omkhonzile?
LH: UCevuzile, Ngelo V, Sigwebo Sentambo, Jaiva Zimnike, Khuzani noSaziwayo
CK: Iyiphi indawo okhonze ukuyoshaywa kuyo umoya?
LH: YisePavilion eThekwini naseMidrand eGoli.
CK: Yiliphi iqembu lebhola olisaphothayo? LH: YiKaizer Chiefs CK: Yiziphi izinhlelo zethelevishini okhonze ukuzibuka?
LH: Ngithanda uGubhu Lwami nemidlalo ewuchungechunge