Bashaqekile kushona uqweqwe lwentatheli
SIKHULU isililo emkhakheni wobuntatheli ngemuva kokudlula emhlabeni koqweqwe lwentatheli uMnuz Sipho Khumalo (59). UKhumalo udlule emhlabeni izolo esibhedlela, eThekwini ngemuva kokugula isikhashana. Le nsizwa yaseDenny Dalton, oLundi ibisisebenza eMnyangweni wokuThutha nokuPhepha koMphakathi KwaZulu-Natal. Udlule emhlabeni engumkhulumeli walo mnyango oholwa uNgqongqoshe Mxolisi Kaunda. Ukudlula kukaKhumalo emhlabeni kushiye ozakwabo emkhakheni wobuntatheli nakuhulumeni beshaqekile. Okhulumela umndeni wakwaKhumalo, uMnuz Lennox Mabaso uthe ukudlula emhlabeni kukaKhumalo kushaqise abaningi.
“Umndeni ukuqinisekisile ukudlula kukaKhumalo emhlabeni. Usebenze emkhakheni wobuntatheli iminyaka elinganiselwa ku-40. Ube ngomunye wabasunguli benhlangano yezintatheli i-Association of Democratic Journalists, ubephinde abe yilungu lenhlangano yababhali, iCongress of South African Writers,” kuchaza uMabaso.
Wake waba nguMhleli weNew neConcord News Agency.
“Wayengomunye wezintatheli ezazimatasa ngesikhathi kunzima kuliwa nohulumeni wobandlululo kulwelwa inkululeko. Wake wasebenzela iphepha iSowetan wabuye wasebenza kwiIndependent Media Group eyintatheli ebhekele izindaba zepolitiki,” kuqhubeka uMabaso.
Ngaphandle kokubhala izindaba ezinohlonze, ubethanda ezemidlalo futhi enolwazi ngebhola lakuleli nelaphesheya kwezilwandle.
Ushiye isikhala esikhulu emkhakheni wezobuntatheli kwazise ubedume ngokucathulisa izintatheli ezisencane African aphinde abe nolwazi olunzulu kwezokubhala.
Isolezwe lidlulise amazwi enduduzo emndenini wakwaKhumalo.
“UKhumalo ube yiqhawe ebuntathelini. Izintatheli eziningi KwaZulu-Natal zisizwile isandla sakhe futhi iningi lazo beliyaye lincokole ngendlela abeqeqeshana ngayo. Ngingomunye wezintatheli osazi kahle isandla namancoko kaKhumalo. Sithi dudu emndenini akwehlanga lungehli. Lala uphumule Mashobane,” kusho uNksz Kiki Ntuli oyiPhini loMhleli weSolezwe.
Ezinkundleni zokuxhumana sibe sikhulu isililo ezintathelini nakubasebenzi bakahulumeni abadlula ezandleni zikaKhumalo.
UMnuz Doctor Ngcobo ongumthwebuli enkampanini ekhiqiza Isolezwe uthe: “Isiyodibana kwelizayo mntomdala.”
IPhini Mhleli ephephandabeni elinguzakwabo weSolezwe, iThe Mercury uMnuz Philani Mazibuko, lithe: “Ngibuhlungu ngokudlula kukaKhumalo. Ubenguzakwethu iminyaka futhi ngaso sonke isikhathi ezimisele ngokusiza nokubonisa ozakwabo.”