Idumela lokushutha bekhulelwe
UNGENISILE kwabesifazane umkhuba wokuzishutha izithombe bekhulelwe, maqede bazisabalalise ezinkundleni zokuxhumana.
Wumkhuba ogqame kakhulu kosaziwayo. Usungene nakwabanye abesifazane abangebona osaziwayo kodwa abathi bakhombisa ukuzamukela benjalo.
Phambilini bekuthathwa njengechilo, ikakhulukazi kwabamnyama ukuveza izisu uma bekhulelwe. Bekunenkolelo yokuthi umzimba wokhulelwe akumele ubonwe wuquqaba, abanye bethi akumele ngisho ashuthe okhulelwe. Kwaba yindaba esematheni owayengumethuli wohlelo lwethelevishini iJam Alley, uPushie, egqoke isikibha esiveza isisu ekhulelwe. Wagxekwa noKelly Khumalo egqoke ingubo eveza isisu ekhulelwe ingane kaSenzo Meyiwa ongasekho.
Nokho sekubonakala ujwayeleka umkhuba wokuveza izithombe zabakhulelwe. Baveza izigaba zokukhulelwa, kuze kufike ezinyangeni eziyisishiyagalolunye.
Ngeledlule uGail Mabalane oshade nomculi uKabelo, kusabalale ezinkundleni zokuxhumana isithombe sakhe ekhulelwe. Sifakwe umyeni wakhe ku-Instagram, azisa abalandeli ngezindaba ezimnandi. UGail ushuthwe egqoke ingubo emnyama eyinethi, eveza sonke isisu nokuma komzimba.
UKabelo ubhale ukuthi: “UNkulunkulu wenza izinto ngesikhathi esifanele. Uyazi ukuthi sidingani, nini nokuthi kanjani. Ngibusisekile, ngilindele ingane yesibili,” kusho yena.
UKabelo noGail banendodakazi eneminyaka emihlanu uZoe. Abalandeli babo bazithakasele lezi zindaba, abanye bencoma nobuhle besithombe.
NgoFebhuwari nonyaka umculi waseUnited States of America uBeyonce, waveza ezinkundleni zokuxhumana ukuthi ukhulelwe amawele. Naye waveza isithombe eveze isisu, waqhubeka efaka nezinye ezihlukile. Wenze njalo nomdlali we-tennis waphesheya uSerena Williams osanda kubeletha ingane yokuqala. Waqala ukuveza izithombe zakhe zokukhulelwa ngo-Ephreli.
Omunye owaduma ngokuzishutha ekhulelwe nguSarah Stage, ongumkhangisi wengqephu phesheya. Isithombe sakhe sabukwa ngabalandeli abangaphezu kwesigidi ku-Instagram. Abaningi bebencoma indlela azinakelela ngayo njengoba engazange akhuluphale njengabanye abakhulelwe.
Umphumela wocwaningo oshicilelwe kwi-website ye-All For Women, uveza ukuthi izinkundla zokuxhumana zinomthelela kulo mkhuba. “Okuvelayo wukuthi umbono uhlukile phakathi kosaziwayo nabesifazane nje abangebona. Kowesifazane ongayena usaziwayo uthola umqondo ohlukile ngendlela azizwa ngayo uma ekhulelwe. Osaziwayo baziveza ezithombeni zokukhulelwa bechachambile, abangebona abakujabuleli ukushintsha kwemizimba yabo uma bekhulelwe,” kusho isitatimende se-website.
Owesifazane ocele ukungadalulwa, uthe ubeqala ukuba nengane ngonyaka odlule, okwenza waya estudiyo ukuyoshutha esakhulelwe. Uthe sikhona isithombe asifaka kuFacebook kodwa abanye bamgxeka bebona sengathi kuphambene nesiko mpilo labamnyama ekubeni yena ubenzela isikhumbuzo esihle.
Ukungazenyezi kwabesifazane abakhulelwe kubonakala nangendlela abagqoka ngayo. Kudala bebegqoka izingubo ezidedelekile kodwa sekwande ezibambayo ngisho kwabakhulelwe.