Umhlangano ngezikhalo zabasekolishi
UMNYANGO weMfundo ePhakeme uzohlangana nabafundi base-Oval International Computer Education College, eThekwini, kusasa uzokhuluma nabo ngezikhalo abanazo mayelana nezinye izifundo ezenziwa kuleli kolishi okuthiwa azibhalisiwe kulo mnyango.
Okhulumela umnyango, uMnuz Madikwe Mabotha, uthe bazobe bekhuluma nabafundi mayelana nezifundo ezenziwa kuleli kolishi elizimele ikakhulu lezo elingagunyaziwe ukuthi lizifundise.
Uthe kuvele ukuthi ezinye zeziqu leli kolishi elizenzisa abafundi akumele ngabe liyabenzisa zona.
“Lo mhlangano wezinsuku ezimbili uzobe uzophendula izikhalo eziningi esizithola kubafundi bakuleli kolishi. Sifuna ukubachazela ngezifundo ezibhalisiwe nezingabhalisiwe,” kusho uMabotha.
Uthe umhlangano uzoba kusasa nangoLwesine eJohn Ross House, kuVictoria Embankment, kusukela ngo-8 ekuseni kuze kube u-4 ntambama kuzona zombili lezi zinsuku.
Umnyango usemkhankasweni wokuhambela nokuvala izikhungo ezizimele ezenzisa izifundo ezingagunyaziwe.
Inhloso yokuhambela izifundazwe ezehlukene ukusiza abafundi ababhalise kulezi zikhungo ukuthi bazi ngezifundo ezibhalisiwe nezingabhalisiwe.
“Uthola ukuthi ikolishi libhalisiwe emnyangweni wethu, kuneziqu ezithile ezibhalisiwe ezinye azibhalisiwe. Abekolishi bamane bafake ezabo izifundo esingabanikanga imvume yokuthi bazifundise yingakho abafundi kumele baqaphele uma beyobhalisa ukuthi lezo zifundo abazozenza zibhalisiwe yini nomnyango. Kumele kube nesitifiketi esizosho ukuthi leso sifundo sibhalisiwe. Abafundi baba nenkinga uma sekumele bathole umsebenzi bengasakwazi ukusebenza ngoba into abebeyenza kufana nokuthi bebelahla imali,” kusho uMabotha.
EGoli kunamakolishi umnyango osuwaphuce imvume yokusebenza ngenxa yokuthi amanye awo awabhalisiwe.