Liyadukisa iphutha elisembhalweni weliba leSilo uShaka
ESIKHATHINI lapho abantu beqhakambisa ukuzigqaja ngemvelaphi yabo futhi kugqugquzelwa nokuthi intsha yazi ngomlando, kuyaphoxa ukubona ukuthi ngo-2017 kusekhona amaphutha ezindaweni ezingamagugu esizwe.
Ihlazo esibike ngalo lo mbhalo oyiphutha elibeni leLembe eleqa amanye amalembe ngokukhalipha, iSilo uShaka, libuyisela emuva lo mbhidlango wokwazi nokwazisa umlando, amasiko namagugu.
Iphutha lisembhalweni osetsheni leliba njengoba kubhalwe ukuthi “Tshaka” esikhundleni sikaShaka.
Akhona namanye amaphutha embhalweni njengoba kusetshenziswe igama elithi “wafa” esikhundleni sokuthi wakhothama okuyindlela okuhlonishwa ngayo amakhosi uma esedlulile emhlabeni.
Sithi kubuyisela emuva ngoba abantu abafunda lo mbhalo uzobadukisa.
Leli litshe labekwa ngo-1932, kasikho ngempela isidingo sokuthi yonke le minyaka iphutha kalilungisiwe.
Ihhovisi likaNdunankulu uMnuz Willies Mchunu kanjalo noMnyango wezobuCiko namaSiko kumele ukusukumele ukulungiswa kwaleli phutha.
Lihlanekezela umlando futhi lilulaza neNdlunkulu.
Sifisa nokudlulisa amazwi enduduzo kwiNdlunkulu ngokudlula emhlabeni kwabaNtwana ababili ababe sengozini yemoto ngoMgqibelo ebusuku, bebabele KwaDukuza ukuyophothula amalungiselelo oMkhosi weLembe.
Kule ngozi kushone uMntwana uMthokozisi wasoSuthu noMntwana uSipho waseNtembeni, okuvele ukuthi bebethunywe yiSilo uZwelithini ukuyobheka ukuhleleka kwezinto zoMkhosi weLembe.
Izingozi zomgwaqo zisaqhubeka nokubhubhisa abantu bakuleli kwazise sithole umbiko wokuthi ngempelasonto kushone abantu ababalelwa ku-14.
Kwezinye zalezi zingozi kushone amalungu omndeni wakwaNcalane ayisikhombisa, imoto yawo ekhalakathele edamini, KwaMaphumulo ngeSonto.
Sithi dudu eNdlunkulu nasemindenini esemanzini ngenxa yengwadla yezingozi zomgwaqo.