Amaciko nomqhudelwano emdlalweni webhola
AGQUGQUZELE ubumbano ngokudlala ibhola amaciko aseThekwini njengoba ebe nomdlalo e-tennis court endala, kuSandile Thusi Road, ngoMsombuluko emini.
Amaciko abedlala emqhudelwaneni wesihle obizwa nge-Active Fields obuhlelwe nguSenzo Mthombeni.
Bekukhona iqembu losomahlaya iComedy Connection eliholwa nguSimphiwe Shembe, Uzalo Team obelumelwe ngabalingisi uSiyabonga Shibe, Thembinkosi Thwala nabadidiyeli bomdlalo, DBN Rockstars ebiholwa nguMondli Ngcobo, Tzz Production kaT’zozo, Greyman kaDJ Merlon, Softer Tissues kaDJ Boonu namanye amaqembu.
Umlingisi woZalo, uThembinkosi Thwala odlala indawo kaMondli, uthe ujabule ngesikhathi ezwa ngemidlalo efana nalena.
“Ngizwe ngayo sekuphuthuma kodwa ngazitshela ukuthi noma kanjani ngiyaya ukuyoba ingxenye yayo. Singamaciko siyakudinga ukuqhubeka sihlangane kanjena senze izinto ezahlukene emphakathini futhi sibonisane nangezinye izinto,” kusho uThembinkosi.
Uthe imicimbi efuze lena idinga ngisho ukuyiswa ezindaweni zasemakhaya ukuze bayohlangana nabantu abasha bakhona.
UT’zozo uthe bafisa ukuthi uMasipala weTheku ungayishalazeli imibuthano enjena.
“Uyabona nawe ukuthi akukho tshwala, singamaciko nje kuphela sihlangene ngemidlalo eyahlukene ukuze sikhuthazane futhi sikhulume ngezinto ezahlukene esibhekene nazo,” kuchaza uT’zozo.
Uthe ngeke besahlehla ekwenzeni imibuthano efana nalena, bathemba ukuthi izolokhu iqhubeke njalo.
USenzo uthe inhloso yabo wukuthi umcimbi uqhubeke yize bebhekene nezingqinamba.
“Sisashoda ngabaxhasi nokuthola abanikazi bendawo esiyisebenzisayo ukuze sibe nemvume ephelele. Sifuna ukuhambela izindawo futhi sigqugquzele nokunakekela impilo. Lena yindlela yokuthi abantu baxhumane futhi namabhizinisi amancane athole indawo yokuzikhangisa.”