Kulindelwe uguquko kumaProteas
KUBHEKWE yezinguquko eqenjini lomqeqeshi wamaProteas, u-Ottis Gibson, elizodlala neBangladesh emdlalweni weTest yokuqala eseSenwes Park, ePotchestroom eqala kusasa ngo10 ekuseni. Ama-Proteas azobhekana namaTigers ochunge-chungeni lwemidlalo emibili yamaTest. Kulo mdlalo kulindeleke ukuthi uDean Elgar avule no-Aiden Markram.
UMarkram (23) usanda kumenyezelwe kwesokuba ngukaputeni omusha wamaTitans. Kulona leli qembu, uvule no-Elgar ngesikhathi bebhekene namaDolphins emdlalweni weSunfoil Series ngesonto eledlule.
Udlale ingcwenga yekhilikithi. Ushaye u-119 kwi-innings yokuqala kwathi ngeyesibili washaya ama-run angu-87. UMarkram akakaze adlale eqenjini elikhulu lamaProteas. Nguyena obengukaputeni iqembu lesizwe lika-Under 19 lidla iNdebe yoMhlaba ngo-2014.
Ngesikhathi amaProteas ebhekene ne-England emidlalweni emine yochungechunge lwamaTest, u-Elgar uvule noHieno Kuhn ongazange enze kahle. inqwaba Ochungechungeni lwemidlalo yamaTest ne-Australia neNew Zealand, amaProteas avulise uStephen Cook no-Elgar. UMarkram useqalile ukufaniswa nenkakha yamaProteas uGraeme Smith. Olunye ushintsho olubhekiwe lukubashwibi. AmaProteas alinyalelwe ngabashwibi abathathu abamqoka. Labo badlali abalimele nguDale Steyn, Vernon Philander noChris Morris. U-Andile Phehlukwayo odlala kumaDolphins uyena ongase athathe indawo kaMorris esikwatini samaProteas. UPhehlukwayo udlala ngokufana noMorris kwazise ufike ashwibe aphinde abe wusizo uma sekubhethwa. Lo mdlali ogijima kumaDolphins ubekhona ngesikhathi elakuleli lishaywa yi-England ngo 3-1 ochungechungeni lwemidlalo yamaTest ezinyangeni ezedlule kodwa akazange adlale nowodwa umdlalo. Eqenjini lemidlalo yosuku olulodwa nakwiT20 udlala njalo. Kuwona lo mdlalo kuzobuya nengwazi u-AB de Villiers ebisahlabe ikhefu emidlalweni yama-Test. UDe Villiers kubhekwe ukuthi abhethe kunombolo 4.