Uyakhula uShange kwi-Walking
ISIFISO sikaLebogang Shange wukubuya nendondo kumaCommonwealth Games azoba se-Australia ngonyaka ozayo njengoba ifomu yakhe ilokhu iya ngokudlondlobala.
Lokhu kuvezwe umqeqeshi kaShange, uChris Britz, ngemuva kokuthi le nsizwa eyenza umdlalo ongajwayelekile kuleli, i-race walking, ithathe indawo yokuqala emqhudelwaneni i-iMulti-day International Race Walking eWuxi, eChina ngoMsombuluko.
UShange uthathe indawo yokuqala kwi-10km washaya irekhodi elisha lakuleli u-39:48. Lo mdlali odabuka eSoweto ubephula irekhodi lakhe lika40:29 alishaya eRome nyakenye.
Leli bekuyirekhodi lesibili likaShange kwazise uqophe elisha kwi-20km ngesikhathi eyibambe kwiIAAF World Championship,eLondon , ngo-Agasti.
Kulo mjaho uShange kwala kancane ukuthi abuye nendondo njengoba agcina engene endaweni yesine.
“Usebenze kahle kakhulu uLebogang okukhombisa ukuthi ifomu yakhe iya ngokukhula njengoba ebe nomjaho omuhle naseLondon,” kusho uBritz. Uthe njengoba bebe nesizini ende, uShange uzoke athi ukukhokha umoya ngaphambi kokuqala amalungiselelo abheke kumaCommonwealth Games. “Usevele ukhona esikwatini esisaqokiwe okwamanje. Uzophumula bese siqala amalungiselelo amaCommonwealth Games ngoba iyona into esiyibheke kakhulu. Ngiyethemba ukuthi uma konke kuhamba kahle uzoba ngomunye wabazothola izindondo,” kusho uBritz. UBritz naye owudlalayo lo mdlalo uthe yize ungandile kuleli kodwa uya ngokukhula. “Bakhona abanye abethembisayo yize bengakafiki ezingeni likaLebohang. Kukhona nje uSizwe Ndebele walapho eKZN engethemba ukuthi naye uzokwenza izinto ezinkulu ngokuhamba kwesikhathi. Into ekhona nge-Race Walking wukuthi kuthatha isikhathi ukuthi umuntu akheke kahle ngokomzimba ukuze afike ezingeni lomhlaba.” Uthe uqale ukusebenza noShange ngo-2014 njengoba elokhu eya ngokuvelela kuleli.