Ufisa ukumela iBafana kwemikhulu
UNOZINTI we-Orlando Pirates, uWayne Sandilands, usenesifiso sokumela iqembu lakhe lesizwe emiqhudelwaneni emikhulu.
USandilands ujoyine iPirates ekuqaleni kwesizini, wafika walenza elakhe ijezi kweZimnyama. Lokhu sekuholele ekutheni abizwe njalo nakwiBafana Bafana.
Muva nje nguyena obesezintini ngesikhathi iBafana ingena ehlazweni ithelwa othulini yiCape Verde emdlalweni wokuhlungela ukuzibekisela indawo kwiNdebe yoMhlaba eseRussia ngonyaka ozayo.
IBafana iqunjwe phansi yiCape Verde eMoses Mabhida Stadium ngo 2-1. USandilands nguyena ubesezintini kulo mdlalo.
UStuart Baxter ocija iBafana uphinde wamfaka eqenjini lakhe elizobhekana neBurkina Faso eFNB Stadium, eSoweto, ngoOkthoba 7.
“KwiSundowns nginqobe inqwaba yezicoco ezimqoka. Nalapha kwiPirates ngibheke ukufike nginqobe izicoco. Esinye isifiso sami esikhulu wukumela iBafana emiqhudelwaneni emikhulu. Ngo-2013 ngangiyingxenye yeqembu lesizwe eladlala kwi-Africa Cup of Nations. Ngisafisa ukuphinde ngidlale kulo mqhudelwano.
“Kuhlale kuyintokozo ngaso sonke isikhathi ukubanga inkundla nabadlali abanonhlonze.
“Njengamanje sibhekene nemidlalo enzima yokuhlungela iNdebe yoMhlaba. Kimina kungasho lukhulu ukumela izwe lami kulo mqhudelwano. Ngikholwa wukuthi kuyiphupho labo bonke abadlali abadlala ibhola ukudlala kwiNdebe yoMhlaba. Njengamanje akusekho ezandleni zethu kodwa okumele sikwenze wukuthi sinqobe imidlalo emithathu esele bese sihlalela ethembeni lokuthi eminye imiphumela izosivuna,” kusho uSandilands.
Esikwatini seBafana esizodlala neBurkina Faso uzobanga ijezi no-Itumeleng Khune osefomini enhle kulezi zinsuku kuKaizer Chiefs noRonwen Williams ogijima kwiSuperSport United.
“Umbango wejezi wenza iqembu libe ngcono. KwiSundowns bengibanga nonozinti abaseqophelweni eliphezulu, kwiBafana ngibanga nonozinti abasezingeni nakwiPirates yinto efanayo. Umbango wenza iqembu libe ngcono. Into ebalulekile wukuthi sisekane. Okumqoka njengamanje wukukholwa wukuthi sisengazibekisela indawo eRussia. Le nto idinga ukuthi iqale ngaphakathi kithina,” kusho uSandilands.
IBafana ihlezi ekugcineni ngephuzu elilodwa ngemuva kwemidlalo emithathu. Ithelwe othulini yiCape Verde kabili yase idlala ngokulingana ngo 1-1 neBurkina Faso.
“Yonke imidlalo yethu ifana neyamanqamu. Sonke siyazi ukuthi yini okumele siyenze,” kusho uSandilands.
Lo nozinti ufike kwiPirates wenza omkhulu umehluko. Usadedele amagoli amabili emidlalweni eyisithupha.
“Ukungadedeli amagoli yinto engiyizuza ngokuhlanganyela nozakwethu. Ngeneme ngokuthi nami ngifaka isandla ekutheni iqembu lithole imiphumela emihle. Ngizimisele nokuqhubeka nokwenza kahle. Inhloso yethu wukubuyisa isithunzi seqembu.
“Ngesikhathi ngizwa ukuthi iPirates iyangifuna angizange ngicabange kaningi. Iqembu elikhulu futhi elinomlando omude ebholeni lakuleli.”